Shillong, Ïaïong 25
Ka Kong Genevieve Pala, kaba la long teng ka Ms Supermom Shillong 2023, ka la paw ha ka lympung Mrs. Voguestar India 2024, kaba la long ha nongbah Jaipur naduh ka 11 haduh ka 16 tarik Ïaïong, bad ka la jop artylli ki khusnam ha kane ka lympung.
Na ka liang ka Fashion Society of Shillong (FSS) hapoh ka jingïalam jong u Bah Aldous Mawlong kum u Chairman ka la ai khublei ïa ka Kong Genevieve halor ka jingwanrah burom ha katei ka lympung.
Ka Kong Genevieve ka la ïoh ïa ki khusnam ha ka ‘City Level’ bad ‘State Level’. Ki la don palat 200 ngut kiba la ïashim bynta ha katei ka lympung na kylleng ka Ri India, bad ka Kong Genevieve ka la wan ha ka thup jong 15 ngut kiba kynsai tam na Meghalaya.
“Ka long ka jingtynjuh ïa nga ban don ha katei ka lympung bad ban ïakhun bad kiwei pat na kylleng ka Ri. Hynrei nga la ïoh shibun ki jingbha ha kane ka jingïaid lynti. Nga la ïoh jinghikai na ka bynta ar bnai na ka Kavita Kharayat, Sunny Kamble bad Alison Woodham kiba long ki briew kiba la pawnam bad kiba la trei bad ki tyngshop bad puron ka Bollywood,” la ong ka Kong Genevieve lyngba ka FSS.
Ka la ong ruh ba ka la mad ïa shibun ki jingeh ha ka jingim, hynrei ka khlem pyndem bad ka la pynleit jingmut ban poi sha ki thong kiba ka la buh.
“Ki khun ki dei ki rishot kiba khlaiñ bor jong nga bad kumjuh ruh ki bahaïing hasem bad ki paralok kiba la ju ïai don bad nga ban kyrshan. Nga kwah ruh ban ai khublei ïa ka Fashion Society of Shillong kaba la ai mynsiem ïa nga. Ka jingjop kum ka Ms. Supermom Shillong 2023 ka la long shisha kaba khraw na ka bynta jong nga namar ka la ïarap ban pynbha ïa nga. Ha kajuh ka por, nga la lah ruh ban ai mynsiem ïa kiba bun ngut kiwei pat ki kynthei bad ban long lem ka sur ka jong ki,” la ong ka Kong Genevieve.
Nalorkata, ka la ong ba ka jingpawkhmat ka jong ka ha kiba kum kitei ki lympung ka la ïarap ïa ka ban pynbha ïa ka kam ba ka trei kum ka nonghikai bad ka nongtrei mon sngewbha. “Ka long ka jingsarong ïa nga ba nga la lah ban mihkhmat ïa ka jylla Meghalaya bad jop ha ka Mrs. Voguestar India 2024. Nga ainguh ïa U Blei na ka bynta kiei-kiei baroh, namar khlem ma U, ngan ym long kumba nga long mynta,” la bynrap ka Kong Genevieve.
