Nongpoh, Ïaïong:
U Majistor ka Ri Bhoi District ha ka Sngi Balang u la pynmih ïa ka hukum ba baroh ki shlem treikam sorkar, ki kali bad ki jingdon-jingem ki lah ban shah ngat ha ka jingshah pynjot ha ki ‘riew shim kabu da kaba bthah ïa baroh ki ophisar jong ki tnat bapher bapher ba kin long peitngor bad phikir bha.
Kane ka jingpynmih hukum ka dei ruh hadien ba na ka liang ki bor pynïaid district ki la ïoh jingtip halor ka jinglong-jingman bad ka jingbym shong shngaiñ ha East Khasi Hills District kaba lah ban ktah ruh wat ïa kiwei kiwei ki district jong ka rilum Khasi Jaiñtia ba kynthup ruh ïa ka Ri Bhoi.
Lyngba kane ka hukum kaba la pynmih, u Majistor ka Ri Bhoi u la hukum ba baroh ki ophisar ba dei khmih ïa ki tnat treikam sorkar bapher-bapher ba kin pynthikna ba ki nongap miet (chowkidar) ki dei ban don ha ki shlem treikam ba ki dei ban ap bad ban pynthikna ruh ba kin don bad ki kum ki tiar pynlip ding, u shyiap bad ka um lada mih kano-kano ka jingshah wiang ding bad ba baroh ki kali sorkar dei ban set ha ki jaka kiba biang bad kiba lait na kano-kano ka jingshah pynjulor.
Shuh shuh, u Majistor u la pyntip ruh ba lada don kino-kino ki jingjia, dei ban pyntip mardor sha u Superintendent of Police ka Ri Bhoi bad ban phone ha kine number +918730940080/+919856084514 kiba dei jong ka Police Control Room bad u Helpline Number 112.
