Shillong, Ïaïong:
Ka Khun Hynñiewtrep National Awakening Movement (KHNAM) hapoh ka jingïalam u Working President, Bah Thomas Passah, ka la kyntu ïa u Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem ba ka la dei ka por ban pynkylla kyrteng noh ïa ka Khanapara sha ka kyntien Khasi khnang ba yn lah ban tip ïa u pud u sam bapura jong ka jylla.
Haba kren sha ki lad pathai khubor ha ka Sngi Balang hadien ka jingwan ïakynduh ïa u CEM, u Bah Thomas Passah u la ong ba namar ba ka kyrteng Khanapara ka la dei lypa ha ka kyntien bar jylla ka long kaba eh ban kam trai ïa ka. Kumta ka seng ka la ai jingmut ba dei ban ai kyrteng noh sha ka kyrteng Khasi.
“Teng-teng ngi ïakren ïa u pud u sam bad lada ka kyrteng ka la dei lypa ka kyrteng bar jylla, ka eh bha ba ngin kam trai ïa katei ka jaka na kata ka daw na ka liang jong ngi, ngi la ong ba dei ban ai noh da ka kyntien Khasi ïa kane ka Khanapara khnang ba kan skhem kata ka jinglong nongkynti jong ngi ïa la u jong u pud u sam”, la ong u Bah Thomas.
U Bah Thomas u la ong ba ka seng kan sa ai da ka jingthoh ruh halor kane sha u Myntri Rangbah ka jylla, u Conrad K. Sangma. Na ka liang u CEM u la kyrpad ruh ïa ka seng ba kan ai jingmut ba kum kino ki kyrteng yn ai bad pynkylla ïa ka Khanapara.
Halor kane, na ka liang ka seng ka la pan jingmut ruh na ki paidbah kiba kham tip bha ïa ka tynrai naduh kulong-kumah shaphang katei ka jaka khamtam ki ‘riew tymmen bad ki ‘riew rangbah ki lah ban ai jingmut sha ka District Council kum kano ka kyrteng kaba shong nongrim ban ai.
