Shillong, Ïaïong 25
Khnang ban tehlakam ïa ka jingpynkheiñ ki ar shaka ïa ki kyndon jong ka Motor Vehicle Act, ki pulit jong ka Lumdiengjri Traffic Branch ha ka Sngi Palei jong ka 25 tarik u Ïaïong, ki la pynlong biang ka jingtalasi ïa ki ar shaka ha Rilbong Point.
Ka jingpynlong jong ki pulit ïa kane ka jingtalasi naphang ïa ki ar shaka ka dei ha ka sien kaba lai tang mynta ka taïew na ka bynta ban peit ïa ka jingbym don ïa ki laisen, ka jingpyndait da ki Modified Silencer bad khamtam eh ïa kito kiba shu pyndait da ki nombar plate kiba la shna hi bad kiba pyndait da ki nombar plate kiba rit bha bad ïa kito kiba la weng noh ïa ka nombar plate HSRP.
Na ka liang ka Shillong Traffic Police (STP) ka la ban jur ïa ki nongñiah ar shaka ba ki dei ban long kiba phikir bha haba ki ñiah ïa ki thuk-thuk bad ba kim dei satia ban pynkheiñ ïa ki kyndon jong ka Motor Vehicle Act.
Nalor ka jingmlien jong ki ar shaka ban shu tur bad phrung naphang, ka tnad pulit kaba pynïaid kali ka la maham tyngeh ruh ba ki nongñiah thuk-thuk kim dei satia ban rung bad tur naphang namarba ki surok ha nongbah Shillong ki long kiba khapngiah bha nalor ba ki kali ruh ki la bun lypa khamtam ha ka por mynstep bad ha ka por ba wai skul ki khynnah. Kane ka jingtalasi jong ki pulit ka long ruh hadien ka jingïohpdiang ïa ki jingujor na ki paidbah ba ki don bun ki ar shaka kiba ju mlien ban pynher bad phrung naphang hapdeng surok bad na ki kyndong-kynshrot kaba la buh jingma pat ïa ka jingim jong ki nongïaid nongïeng bad kumjuh ruh ïa ki kali.
Shuh shuh na ka liang ka tnad pulit pynïaid kali ka la maham ruh ba kane ka jingtalasi ïa ki ar shaka kan long man ka por khnang ban lah tehlakam ïa kum ki jingmlien kiba lah ban wanrah jingma-jingmynsaw pat ïa ki paidbah.
