Shillong, Ïaïong 26
Wat hadien ba la kut ka jingthep ‘vote’ ha kane ka ilekshon Lok Sabha, ka jingpyntreikam ïa ki kyndon pyrkhing ilekshon ka dang treikam ha kane ka Jylla. Hynrei ki don ki projek kiba ym don jingktah ban pyntrei shakhmat khamtam kito kiba la dep ïaid teng ka kam hadien ba dep mang pisa bad la dep aiti ïa ka ‘work order.’
U Chief Electoral Officer (CEO) ka Jylla, u Dr. B.D.R Tiwari u la ong ba ki kyndon pyrkhing ilekshon ki dang treikam tad haduh ban da dep ñiew ‘vote’ wat lada ka jingthep ‘vote’ ha kane ka Jylla ka la dep ha ka 19 tarik u Ïaïong.
U la ong ba katkum ki kyndon pyrkhing ilekshon, ki kam pynroi kiba dei ban sdang pyntrei thymmai ym lah satia ban sdang mynta bad ym lah ruh ban aiti ‘work order’ thymmai mynta.
Hynrei ïa ki kam kiba la dep sdang pyntrei ym don jingkhang ne jingteh bad kito ki projek ruh kiba la dep mang pisa bad la dep aiti ïa ka work order ha kaba ka kam ka la nang ïaid wat lada ym pat pyllait ïa ka pisa.
U la ong ba kum ïa kita ki projek ym don jingteh ban pyllait pisa namar ki dei kiba la dep ng ka pisa bad la nang pyntrei hadien ba la ïohpdiang ïa ka ‘work order’.
