Shillong, Nailur 13
Ka Hynniewtrep Integrated Teritorial Organizations (HITO) Shillong City bad ka Mawlai Circle ha ka Sngi u Blei ka la beh krad ïa ki bar Jylla ba trei bylla khlem ki kot ki sla ba biang ha kawei ka ïing kaba don ha Mawlai-Mawroh, Shillong.
Haba ai jingkren na ka liang u Bah Pynshngaiñ Nongrum uba long Organizing Secretary ka HITO Shillong City u la ïathuh ba ka seng ka la ïoh jingujor na ki paidbah nongshong ba don kitei ki nongtrei bylla bar Jylla bad haba ki Dkhot ki la leit ban pynthikna la kitei ki nongtrei ki don ne em ki kot ki sla kiba biang, hynrei la shem ba kitei ki briew kim don ïa ki kot ki sla donkam kum ka Labour Licence bad ki Police Varification.
Shuh-shuh u la ïathuh ba kine ki briew dei na Dhubri bad na Barpeta Assam, ki wan ban trei bylla hangne kum ki nong niad rong bad pyndait ïa ki ’tile’, haba la lap ba kine ki briew kim don ïa ki kot ki sla kiba biang ban trei bylla hapoh ka Jylla, ka HITO ka la phah ïa ki ban leit phai noh na ka jaka ba ki wan.
Haba ïadei kum kine ki jingjia u Bah Pynshngaiñ, u la kyntu ïa ki kontraktor lane ki trai ïing kiba ai kam ïa ki briew ba na bar ka Jylla, ba ki dei ban pynbiang ïa ki kot ki sla kata ka Labour Licence, Police Varification jong ki nongtrei ba ki wanrah, khang ban tip ba kine ki briew kiba wan bylla ki dei ki bym don dak sniew lane kino-kino ki kam sniew ba pynbud nam sniew ïa ka Jylla.
Nalor kata ka HITO, ka la kren shai ba kan beh beit ïa ki nongtrei bar Jylla kiba wan ban bylla khlem ki kot ki sla kiba biang, kum ka Labour Licence, ka Police Varification bad kdew ba kine ar ki dei ban pynbiang beit haba ki wan ban trei bylla hapoh ka Jylla.
