Jowai, Nailur 13
Ki spah ngut ki nongshong shnong ka Bamkamar, kaba hapoh ka Elaka Nartiang, West Jaiñtia Hills District kila pynpaw ka jingbym hun halor ka jingithuh Acting Waheh Shnong ka Jaiñtia Hills Autonomous District Council (JHADC) ïa u Bah Medris Nongrum khlem ka jingtip bad mynjur u paidbah nongshong shnong.
Ïa kane ki nongshong shnong ka Bamkamar kila pynpaw ha ka jingïalang paidbah kaba la long ha ka LP School Bamkamar ha ka 12 tarik Nailur.
U Waheh Shnong barim Bah Thomlin Rynjah haba kren sha ki lad pathai khubor, u la ïathuh ba kane ka kynrum kynram ka mih na ka Dorbar khatduh kaba khot pynlong myn ha ka 3 tarik Jylliew 2026, hadien ba ka samoi treikam jong u waheh shnong kala kut noh naduh ka 16 tarik Jymmang 2026.
U la ong ba katei ka Dorbar kam shym la long kaba ïaid beit ïaid ryntih, namar kawei ka liang ka pyrshang ban jied ïa u waheh shnong da u briew uba ka mon, katba ki paidbah nongshong shnong pat ki kwah da ka jingïathep vote.
Halor kane ka jingdawa, u la ïathuh ba ki paidbah kila dep ban aiti da ki jingthoh sha u Dolloi ka Elaka Nartiang kumjuh sha ka JHADC.
Hynrei kaba pynlyngngoh ïa ki kum ki nongshong shnong, u la ong ka dei hadien ba kila ïoh pdiang ïa ka shithi kaba ka JHADC kala ong ba u Dolloi u la dep ban ai ïa ka jubab ba ha ka por pynlong ïa katei ka dorbar, kala don ka huri hura hapoh ka shnong Bamkamar bad u la pynshai ruh ba ym pat lah ban pynlong ïa ka ilekshon ban jied ïa u waheh shnong ba pura namar kan ktah ïa ka shongsuk shongsain hapoh ka thaiñ.
Shuh shuh ka shithi kala ong, hadien ba ka JHADC kala peit bniah ïa ki kaiphod jong u Dolloi, kala bthah ïa u (dolloi) ban pynpoi ïa ka kyrteng jong u briew ban thung kum u Acting waheh shnong katba ym pat jied ïa u waheh shnong ba pura. Ha kaba na ka liang u Dolloi u la ai ka jingmynjur ban ithuh ïa ka kyrteng u Bah Medris Nongrum kum u waheh shnong ba shipor jong ka shnong Bamkamar.
Halor ka huri hura kumba la kynnoh jong u Dolloi, na ka liang u Bah Thomlin u la kyntait, da kaba ong, ym shym la don kaba kum kata, lait noh tang ka jingkynhoi risa jong ki paidbah halor ka jingkwah jong ki ban pynlong da ka ilekshon na ka bynta ban jied ïa u Waheh Shnong ba pura jong ka shnong Bamkamar.
Baroh ki nongkren ha ka jingïalang kila pynpaw ïa ka jingkwah jong ki ban jied ïa u waheh shnong thymmai da ka ilekshon khnang ban ïoh ïa u nongïalam uba hok, bad don ka jingkitkhlieh na ka bynta ka shnong ka thaw bad ba ki nongshong shnong ruh kin ïoh ïa ka hok ban jied laitluid ban jied ïa u waheh shnong ba pura kat uba ki sngewbit sngewbiang.
