Shillong, Nailur 13
Ka jingmih khubor ha kine ki sngi ba u MLA ka UDP na Mowkaiaw constituency Bah Nujorki Sungoh un rung sha ka NPP ka lah ban urlong lada ka Sorkar Jylla kaba la ïalam da ka NPP kan pynkiew kyrdan noh ïa ka Laskein Block sha ka Civil Sub-Division.
Katkum ki khubor ba la ïoh lum na ki nongkitkam ka UDP Mowkaiaw constituency ki la ïathuh ba kane ka jingdawa ban pynkiew kyrdan noh ïa ka Laskein C&RD Block kaba hap ha West Jaiñtia Hills District sha ka Laskein Civil sub division ka dei kaba la slem hynrei kam pat la urlong.
Ki khubor ki ïathuh ba lada ka Sorkar Jylla ba la ïalam da ka NPP ka kular ban pynkiew kyrdan ïa ka Laskein block kaba mut ba ki nongkitkam bad ki nongkyrshan ka UDP na Mowkaiaw constituency kin kyrshan ïa u MLA ban leit rung sha ka NPP.
Shuh shuh ki la ïathuh ba kane ka jingrung NPP u Bah Nujorki ka la mih ruh na ki paidbah hadien ba la mih ki khubor ba ki 9 ngut ki MLA ka UDP kin mih noh ban rung sha ka BJP.
Na ka liang ki nongkyrshan u Bah Nujorki pat ki kwah ba un leit pynïasoh sha ka NPP namar donkam ïa ki kam pynroi hapoh ka constituency.
Ki khubor ki ïathuh ba kane ka jingdawa Civil sub division ka la don ka jingïatan tyllai bad kiwei de ki constituency kiba don marjan hynrei ki la ai jingmut ba lada buh kham shajngai ïa ka Laskein Block kaba mut ka la jan ïa ki ban leit beit sha Jowai namar ka jingdawa ban pynkiew ïa ka Laskein Block sha ka Civil sub division kan pynsuk ïa ki paidbah kiba sah ha khappud bad ka Assam.
Ki nongkitkam ka UDP ki la pyntip ba ha kine ki sngi haba ki la ïakynduh ïa u Conrad K Sangma uba dei u Myntri Rangbah ka jylla, u la kular ban pynkiew kyrdan noh ïa ka Laskein Block sha ka Civil sub division dei halor kane ka nongrim ba lada ki 9 ngut ki MLA ka UDP kin leit sha ka BJP kaba mut ka la suk ïa u Bah Nujorki ban rung sha ka NPP bad u Bah Renikton Lyngdoh kumba mih khubor ha kine ki sngi.
Na ka liang ki nongkitkam ka NPP Mowkaiaw constituency ruh ki pdiang ïa kaei kaba ki nongïalam ka NPP napoh ka jylla ki la ïa pynbeit ban rung NPP u MLA ka UDP Bah Nujorki khnang ban wanrah ïa ki kam pynroi hapoh ka constituency.
