Shillong, Nailur 13
U Myntri Rangbah ka Jylla, u Conrad K. Sangma ha ka Sngi U Blei u la kynmaw burom ïa u Myntri Rangbah barim ka Jylla, u Dr. D.D. Lapang ha ka lyngkhuh sngi ïap banyngkong jong u, da kaba ong ba u long u kum ka jingshai kaba lam lynti na ka bynta ka Jylla.
Haba kynmaw burom ha ka jingthoh ha ‘X’, u Sangma u la ong ba ïa u Dr. Lapang la ñiew kum u nongsaiñdur ïa ka Ri Bhoi District bad u dei ruh u nongïalam paidbah ba shisha bad uba long ruh kum u Kpa.
“Ka jingkynmaw burom ïa u Myntri Rangbah barim, (L) Dr. D.D. Lapang ha ka lyngkhuh sngi ïap banyngkong jong u. La burom ïa kum u nongsaiñdur jong ka Ri Bhoi District, u Maheh Lapang u la long u nongïalam paidbah ba shisha, u la long kum u Kpa bad ka jingshai ba lam lynti na ka bynta ka Meghalaya,” la thoh u Sangma.
Shuh shuh u la ong ba ka jingïohi jngai jong u Dr. Lapang na ka bynta ki paidbah ka Meghalaya kan long ka ban ïaisah kynmaw bad ba ka jingshemphang jong u kan ïai bteng ban btin lynti ïa ka Jylla.
“Yn ïai kynmaw ïa phi, Maheh,” la bynrap biang u Myntri Rangbah ka Jylla.
