Shillong, Nailur 13
Ha ka jingïohpdiang ïa ki jingujor haba ïadei bad ka notice kaba la pymih na ka ophis treikam u Deputy Commissioner ka East Jaiñtia Hills District ban lilam ïa u dewïong, uba don kumba 1 lak 21 hajar, metric tonne, na ka liang ka Hynñiewtrep Integrated Territorial Organisation (HITO), ka la leit ban buh da ka shithi ha ka ophis treikam u Shakeel P. Ahammed, Chief Secretary ka Sorkar Jylla, ba un tuklar halor kane ka kam.
Haba kren sha ki lad pathai khubor, u Bah Balajied Jyrwa, u la ong ba ka la don ka jingkynnoh ba ïa katei ka notice, la pynmih hak dak khlem da don ka jingpynbna kaba thikna, khnang ba ki paidbah kin ïoh ban ïashim bynta lang ha katei ka auction lane ban thep ïa ka tender.
U la ong ba na ka liang ka HITO lyngba ka shithi kaba la aiti ha ka ophis u Chief Secretary, ka la kyrpad ba ka rukom thep tender, kadei ban long ha kaba shit ba shai bad ka bym noh shiliang ïano-ïano ruh.
Nalor kata, u la kyntu ruh ïa u CS, ba u dei ban pynlong da ka jingtohkit halor ka jingpynmih ïa katei ka jingpyntip bad lada kadei kaba la pynmih khlem da bud ïa ka Standard Operating Procedure, u dei ban weng noh shuwa ïa ka.
