Shillong, Nailur 13
Ka ‘Biennial Conference’ jong ka Meghalaya College Principals` Council (MCPC) ka la long ha ka 11 tarik Nailur, 2026 ha St. Anthony’s College, Shillong.
Kane ka jingïalang ka la lum lang ïa ki Principal bad ki dkhot jong ka MCPC kiba mihkhmat ïa ki kolej na kylleng ka Jylla. Ka jingïalang ka la ai ka rynsan kaba kongsan ban ïathir halor ki mat ba ïadei ha ka pule-puthi, ka jingpynïaid kam, bad ki mat ba ïadei bad ki shlem pule kiba ktah ïa ki jingpule ba shalor ha ka Jylla.
Ka ‘Technical Session’ ka la pynleit jingmut ha ki katto-katne ki mat kiba ïadei bad ki eksamin ba la pynlong da ka North-Eastern Hill University (NEHU), ki mat ba ïadei bad ka jingpynïasoh, ka jingwanrah ïa ka jingpule saw-snem hapoh ka Four-Year Undergraduate Programme (FYUGP), ki jingeh kiba ïadei bad ki ‘Curriculum’ bad ki ‘Syllabus’, bad ka jingpyntreikam ïa ka prokram ‘Internship’.
Ka Council ka la ïakren ruh halor ki mat ba la tyrwa ban ai jingmut sha ka Sorkar kiba kynthup ban buh ïa ki CUET-Centre ha man la ki ‘Headquarter’ jong ki distrik; ka jingpyntreikam kaba paka ïa ka CPF kaba thymmai na ka bynta ki nongtrei jong ki kolej ‘Deficit’; ka jingkner ïa ka jingsiew UGC sha ki nonghikai jong baroh ki kolej ba kyrshan da ka Sorkar, kynthup ïa ki People’s College bad ki Adhoc College; ka jingpynneh ïa ki kam ‘UGC-Scale’ ba la mang bad don lypa ha ki kolej; bad ka jingpynneh ïa ki kam ba la mang da ka UGC ha ki kolej ‘Deficit’ kiba la pynkylla sha ki ‘People’s College’.
Ka jingïalang ka la pynpaw ïa ka jingsngewkhia kaba jur ha kaba ïadei bad ka jingthmu jong ka Sorkar ban pynsangeh noh ïa ka rukom siew tulop ka UGC, naba kane kan ktah ïa ka jinglong-jingman jong ka jingpule ba shalor ha ka Jylla.
Na ka liang ka MCPC ka sngew ba ka UGC Career Advancement Scheme (CAS) ka la ïarap ïa ki nonghikai ban ïakhun bad ban ïoh ïa ka kyrdan kaba kham heh katkum ki kyndon jong ka ban kyntiew ïalade ha ka ban pynneh ïa ka kyrdan kumba long kiwei pat ki nonghikai kolej ha ka ri.
Ka jingïalang ka la kyntu shuh-shuh ïa ka Sorkar ban ai ïa ka jingïarap pisa kaba tang shisien sha ki kolej na ka bynta ban pynroi ïa ki jingtei, kumjuh ïa ki jingïarap pisa ba man ka por ban kyrshan haba ïadei bad ka jingthung nonghikai na ka bynta ki ‘Vocational Training Course’ bapher-bapher. La ïakren ruh halor ki mat kiba ïadei bad ka jingpynslem ha ka jingthung kam bad ka jingpynkiew kyrdan ïa ki nonghikai bad ki nongtrei jong ki kolej.
Ha kane ka jingïalang la pynskhem ruh ïa ki nongkitkam bad ki dkhot ‘Executive’ jong ka MCPC na ka bynta kawei pat ka samoi treikam. Ïa kane ka Council yn ïalam da ka Dr. Eureka F. P. Lyngdoh kum ka President, Dr. K. K. Nongsiej – Vice-President, Dr. R.M. Manih – General Secretary, Dr. S. Khongwir – Joint Secretary, bad Dr. Ratnadeep Roy – Treasurer. Ka Executive Committee kan kynthup ruh ïa 13 ngut ki dkhot ki ban mihkhmat ïa ki kolej bapher-bapher ha kylleng ka Jylla.
Ka jingïalang ka la rai ruh ban pynkhlaiñ ïa ka MCPC kum ka rynsan kaba ïatyllilang na ka bynta ki Principal bad ki khlieh jong ki kolej ha kylleng ka Jylla. Ka la ban jur halor ka jingdonkam ban don ka jingïatreilang kaba kham bha bad ka jingmihkhmat lang ha ki mat kiba ïadei bad ka jingbha, ka jingroi bad ka jingpynïaid kam kaba paka haba ïadei bad ka jingpule ba shalor ha ka Jylla.
Na ka liang ka Council ka la rai ruh ban ïakren bad ki khlieh nongpynïaid jong ki kolej bad ban pynshlur ïa ka jingïashim bynta kaba kham bun haba phai sha ki mat kiba myntoi lang.
Ha kane ka sngi la don lang u Vijay Kumar Mantri, IAS, Commissioner & Secretary ka tnad pule-puthi ka Sorkar Meghalaya, uba la long kum u Kongsan. Ha ka jingkren jong u, u Kongsan u la kubur ïa ki jingeh ba la pynpaw da ka Council bad pyntikna ïa ka jingïalang ba ïa ki mat ba la pynsngew lyngba ka dorkhast yn sa peit bniah da ka Sorkar.
Shuh shuh kane ka jingïalang ka la ai ka rynsan kaba tei ïa ki Princiapl bad ki nongmihkhmat jong ki kolej na kylleng ka Jylla ban ïakren halor ki jingeh kiba kongsan ha ka liang ka jingpule, ka jingpynïaid kam bad ka roi ka par. Ki jingïamir jingmut ki pynpaw ïa ka jingangnud jong ka Council ban pynkhlaiñ ïa ki shlem pule ba kham shalor ha ka Jylla bad ban kyntiew ïa ki jingpyrshang ba ïatreilang ban pynbha ïa ka jinglong-jingman bad jingtreikam jong ka jingpule ba kham shalor.
