![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Ïaïong 26
Ka khubor na ki pulit ha ka Sngi Thohdieng ka ïathuh ba kawei ka longkmie ïa kaba la tip kyrteng kum ka Kong Risha Mawlong ka la ujor ba ha ka 14 tarik Ïaïong ha ka por kumba 3 baje nohphai sngi, u khun jong u, ïa uba la tip kyrteng kum u Shanskhem Mawlong, 26 snem ka rta, u la mih na la ïing kaba don ha Umsohlang, Mawleiñ ha East Khasi Hills, bad u khlem wanphai shuh.
Hynrei, ki pulit ki la ong ba ha ka 15 tarik Ïaïong ha ka por kumba 9 baje mynstep, ki la don kiba pyntip sha katei ka longkmie ba la lap ïa u khun jong ka uba la khlad na Umsohlang.
Ha kawei pat ka jingjia, ki nongshong shnong ka Jaïaw Langsning, ha ka 25 tarik Ïaïong ha ka por kumba 5:15 mynstep, ki la ïoh bat ïa uwei samla briew uba la don 27 snem ka rta na Lad Jaïaw, bad ki pulit ki la ong ba na une u samla, la lap ïa kawei ka ‘Woofer’ kaba la tuh.
Ki pulit ki la ïathuh ruh ba u Songstar Shabong u la ujor ba ha ka miet jong ka 23 bad 24 tarik Ïaïong, ki runar ki la tuh ïa ka thuk-thuk jong u (ML-05R-8683) na Mawlai Umjaïur, Shillong. Hynrei, ha ka 25 tarik Ïaïong, ki shipai ïada khappud, ki BSF, ki la lap ïa katei ka thuk-thuk na ka shnong Pyrdiwah ha East Khasi Hills.
Nalorkata, ki pulit ki la ïathuh ba kawei ka nongshong shnong ïa kaba la tip kyrteng kum ka Edelweiss Nongrum, ka la ujor ba ha ka 24 tarik Ïaïong ha ka por kumba 2:30 mynstep, ka la lap ba ka thuk-thuk jong ka (ML-04E-0303) ka la shah tuh na ka ïing sah jong ka kaba don ha Lumphareng Mihmyntdu ha West Jaiñtia Hills.