Jowai, Risaw 25
Ki riew donsap ha ka tem ka put, bad ka rwai ka siaw, kila thaw ïa ka seng kaba tip kum ka Jaiñtia Artist Association (JAA) da ka jingthmu ban ïada ïa ka hok, ban kyntiew ïa ka kam, bad ban peit ïa ka bha ka miat jong ki nongrwai nongtem ki nong Jaiñtia.
Ïa kane ka seng la pynbna paidbah ha ka jingïalang kaba la long ha Tpep Pale ha ka janmiet 24 tarik Risaw ha ka jingdonlang u Symbud Myntri Rangbah ka Jylla Bah Sniawbhalang Dhar bad ka Emelya Ch. Momin, MCS Assistant Commissioner, West Jaiñtia Hills District.
U Bah Sniawbhalang Dhar ha ka jingkren u la kyntu ïa ki nongrwai nongtem ban trei shitom ha kano kano ka bynta kaba ki sdang, namar ka jingjop kaba shisha kam dei kaba shu ïoh tang haba thiah, hynrei ka jingjop kaba shisha ka dei kata kaba pynlong ïa ki ban duh thiah.
Ha ka jingïalang u Bah Sniawbhalang u la pynbna ba un pynlong ïa ka jingïakop na ka bynta ki nongrwai Jaiñtia shwa ka Khristmas kaba un pynlut hi na pla lade kum ka jingai jingithuh ïa ki samla don sap ha ka liang ka rwai ka tem.
“Nga dang pyrkhat, shwa ka Khristmas kan don ka jait jingïakop kaba ïadei bad ki nongrwai Jaiñtia. Ka dei tang ka jingtyrwa. Ngi dang pyrkhat bad ïakren mynta,” la ong u Bah Sniawbhalang.
U la pynsngew ruh ba u la ai song pisa kaba T.10 lak na ka bynta ka prokram plie paidbah bad u la pynthikna ban kyrshan pura ïa ka JAA, da kaba bynrap ba kane ka dei tang ka jingsdang, ka jingkhang jong u ka plie beit ha kano kano ka por.
U pynpaw ruh ïa ka jingangnud jong u, ba ka Jaiñtia Hills kan long ka thaiñ kaba paw bha ha ka liang ka put ka tem, ka rwai ka siaw, ym tang ha ka jylla hynrei ha ka ri hi baroh kawei.
U la kren ruh halor ki jingpyrshang jong ka Sorkar Jylla ban kyntiew ïa ki samla lyngba ki 35 tylli ki skhim jingïarap ha kine ki 8 snem ba la dep.
U la kren ruh halor ka jingduna ka jingïatylli ha ka jaidbynriew Khasi Pnar. Katba kiwei ki jaidbynriew ki don ka jingïatylli hapdeng para maki.
U la ong ba ka jingbym don ka seng kaba biang ha Jaiñtia Hills ka la khang lad ïa ki nongrwai ban ïoh jingïarap na ka Sorkar, ym kum ha Khasi Hills bad Ri Bhoi.
Dei na kata ka daw u la ong ba u la ai jingmut ïa ki ban thaw ïa kane ka seng bad mynta ka sngi ka la urlong, da kaba kyntu ban long kiba ïatylli,” u la ong.
Shwa kane la ïoh ka jingkren pdiang na ka Vice President Riwanlin Timung bad ka jingkren lyngkot na President Redeemson S. Pakma.
