Shillong, Risaw 25
Ka ‘Rynsan U Paidbah’, Raid Madan Kyrdem, Khyrim Syiemship, ki la mih shakhmat ban ai ka jingkyrshan halor ka jingwad RTI jong u Bah Disparsing Rani.
U Bah Disparsing Rani, uwei na ki nongwad jingtip lyngba ka Right To Information (RTI), u la sei madan ïa ki kot jaka kumba 20 tylli kiba la shah tah sia-lieh, kiba la shim ban pynïaid Gas Pipeline na Guwahati- Shillong- Silchar jong ka North East Gas Grid Project, ba la pyntrei da ka Indradhanush Gas Grid Ltd.
Kumta ka la pynlong ïa Ka Rynsan U Paidbah, ban ai ka jingkyrshan halor kane ka mat.
Haba kren sha ki lad pathai khubor, u Bah Parson Masharing u la ong, na ka liang ka kynhun ruh kadei kaba don bynta ban pan ïa ka RTI ryngkat bad u Bah Disparsing bad kumta ka ai ka jingkyrshan ïa utei u rangbah uba la mih shakhmat ban leh ïa kane ka kam.
U la ong ruh ba kum ki nongshong shnong ka Raid Kyrdem, ki kwah ïa ka jubab kaba shai halor ka RTI da kaba kdew, ba ka jingtah da ka sia lieh ka pyni ba don ei-ei sha lyndet.
Nalorkata, u la ong ruh ba ka Sorkar kadei ban leh kham kloi halor kane ka kam bad ban byrthen ba kam dei shuh ban wan da kaba dap da ka sia lieh nangne shakhmat.
Ha kawei pat ka liang, u Bah Parson u la ong ba u Acting Sordar katei ka Raid, um dei shuh ban die ïa ki jaka nangne shakhmat katba ym pat ïoh ïa u Sordar ba thymmai, namar ba ka samoi treikam jong u, ka la kut.
