Shillong Risaw 25
U James PK Sangma uba dei u MP ka Rajya Sabha bad ruh u Nongïalam ka NPP u la ong ba ka jingkiew kynsan jong ka BJP na ki 2 ngut sha ka 10 ngut ki MLA hadien ka jingleit pynïasoh ki 8 ngut ki MLA ka UDP ka dei shi bynta jong ka jingkylla ha ka kam saiñpyrthei hynrei ym dei pat ban sngewthuh bakla bad ka jingjied ki paidbah ha ka por ilekshon.
Haba kren halor katei ka bynta, u James Sangma u la ong, ka jingphet seng ka dei kaba ju jia khah khah ha ka kam saiñpyrthei ha ri India.
“Kane baroh ka dei ka politik. Ki briew ki leit rung na kawei ka seng sha kawei pat, kine ki jingjia ki dei kiba ju ïai jia ha ka kam saiñpyrthei hapoh ri India. Ngi la ïai sakhi ïa kane man la ka por hynrei ka ïapher pat na ka jingjied jong ki paidbah ha ka por ilekshon,” u la ong.
Katkum ka jingong ka jong u, ka jingthew kaba shisha hi ïa ka jingkhlaiñ jong ka seng kan shong eh ha ka jingïoh vote ha ka por ba pynlong ïa ka ilekshon.
“Ngi donkam ban thew ïa kaei kaba mih ka resol ha ka por ilekshon bad ka long kaba kongsan ban peit ïa ka na ka mat ha ka por ba long ka ilekshon, haduh katno la ïoh ïa ki vote da man la ki seng saiñpyrthei,” la ong u James.
Haba kylli la kane ka jingkiew ka BJP ha ka jingdon ïa ki MLA kan ktah ïa ka NPP, u la ong, ba ka jingïatynjuh hapoh ka ïingdorbar bad ka jingïoh jingkyrshan ha ki shnong ki thaw ki treikam ha la ki jong ki jong ki jaka.
“Ka jingkylla ha ka jingkhlain ka seng ha kaba ïadei bad ka jingmihkhmat hapoh ka ïingdorbar kan wanrah ïa ka jingkylla ha ka jinglong jingman. Hynrei haduh katno kane kan wanrah ïa ka jingkylla ha ki shnong ki thaw bad ka jingkhlain ka seng ha ka por ilekshon, kine ki dei ki artylli ki bynta kiba ïapher kawei na kawei pat. Hooid, ha kawei ka bynta kan wanrah ïa ka jingktah hynrei ha kawei pat ka liang, ka lah pat ban ym don satia kano kano ka jingktah,” u la bynrap.
Haba kylli halor ka jingsaphriang ki khubor ban pynhiar shuki noh ïa u Bah Metbah Lyngdoh na ka Kynhun Myntri, u James u la kyntait ban kren eiei halor kane.
“Nga ngam ïa donbynta eiei bad ka Sorkar. Nga dei tang u Member of Parliament (MP). Kine ki jingkylli dei ban buh ïa ka Sorkar Jylla, ïa ki Myntri Sorkar ne ïa u Myntri Rangbah,” u la ong.
Hato ka don kano kano ka rukom pyrkhat hapoh jong ka NPP ban ailad ïa kiba dang rung thymmai sha ka seng ban ïoh khusnam, u la bynrap, “Kan don beit ka rukom pyrkhat hapdeng ki nongkitkam ka seng. Ha ka jingpyrkhat shimet nalade hi, ngam lah ban ong eiei. Kumba nga ong, ngam don bynta eiei bad ka Sorkar”.
