Shillong, Risaw 25
Ka khana shaphang u krai na Meghalaya ka la ïoh bynta ha ka rynsan jong ka ri ha ka Sngi U Blei hadien ba u Myntri Rangbahduh ka ri, u Narendra Modi u la ïaroh ïa ki nongrep bad ki kynthei nongseng kam lajong na kane ka Jylla ha ka prokram ‘Mann Ki Baat’.
Haba jubab halor kane ka bynta, u Myntri Rangbah ka Jylla, u Conrad K. Sangma u la pynpaw ïa ka jingsngewnguh jong u lyngba ka jingthoh ha ‘X’, da kaba ong ba kane ka jingithuh kan ai mynsiem ïa ki hajar ngut ki nongrep kiba trei ban pynneh-pynsah ïa ki mar rep tynrai.
“Ka jingai khublei ïa u Myntri Rangbahduh ba don burom Shri @narendramodi ji uba la ithuh ïa ka riti-dustur bariewspah jong ka Meghalaya ha kaba ïadei bad ka jingrep krai bad ban pynpaw ïa ka jingpyrshang jong ki nongrep bad ki kynthei nongseng kam jong ngi ha ka #MannKiBaat mynta ka sngi,” ong u Conrad.
Ha ka jingkren jong u ha ‘Radio’, u Myntri Rangbahduh u la kdew ïa ki jingpyrshang jong ka Meghalaya bad jer kyrteng ïa 3 ngut ki ‘riew shimet kiba la seisoh ha la ki jong ki jong ki bynta.
U Conrad u la kdew, “Khublei ïa u Myntri Ranagbahduh ba don burom na ka bynta ka jingkdew kyrpang jong u ïa u Chekjing Sangma na Sadolpara, West Garo Hills, na ka bynta ban pynim biang ïa ka jingrep krai, bad ka Kong Darapbiang Mulieh bad Kong Daieidlangki Suchiang na Khanduli, West Jaiñtia Hills, na ka bynta ban kyntiew ïa ki mar rep ba pynmih na u krai bad ban pynneh-pynsah ïa ki riti-dustur u mynbarim ba ïadei bad ka rep ka riang.”
U Chekjing Sangma na Sadolpara u la ïoh burom namarba u la wanrah biang ïa u krai sha ki jaka rep ha West Garo Hills, katba ka Kong Darapbiang Mulieh bad Kong Daieidlangki Suchiang na Khanduli ha West Jaiñtia Hills ki la pynkylla ïa u krai sha ki mar ba bit dor bad ba ïohnong, ha kawei ka liang kaba plie lad plie lynti ïa ki lad kamai na ka bynta ki longkmie nongkyndong.
U Myntri Rangbah u la ong ba ka Jylla kan ïai bteng ban kyrshan ïa kum kine ki jingthmu.
“Kum ka Sorkar, ngi dang ïai bteng ban kyrshan ïa ki nongrep jong ngi, ban pynkhlaiñ ïa ki lad kamai ha ki nongkyndong bad ban trei na ka bynta ka jingthmu ba ïasam lang jong ngi ban kyntiew arshah ïa ka ïoh ka kot jong ki nongrep,” u la ong.
Ka Sorkar Jylla ka la kyntiew ïa u krai kum shi bynta jong ka jingpynleit jingmut jong ka ha ka rep ka riang kaba neh, ka jingshngaiñ ha ka bam ka dih bad ka jingpynmih khajna na ka bynta ki nongrep ha Ri-lum Garo bad Jaiñtia.
