![Ha ïing u Symbud Myntri Rangbah ha Nongmensong, kawang petrol bom ki runar, ym don ba mynsaw ing-u-sniawbhalang](https://unongsainhima.com/wp-content/uploads/2024/04/ing-u-sniawbhalang.jpg)
Shillong, Ïaïong 26
Ka jingkawang petrol bom ki runar ha kane ka nongbah ka la nang bteng bad mynta ka sien ki runar ki la leit ban kawang petrol bom syndon ïa ka ïing jong u Symbud Myntri Rangbah ka Jylla, u Bah Sniawbhalang Dhar kaba don ha Nongmensong.
Ki pulit ki la ïathuh ba kane ka jingjia ka la jia ha ka step phyrngab jong ka Sngi Thohdieng.
Na ka liang u Superintendent of Police (SP) ka East Khasi Hills district u Rituraj Ravi, u la ong ba ki pulit ki dang tohkit halor kane ka jingjia ban lap ruh ïa ka jingthmu shalyndet ban leit kawang petrol ïa ka ïing u Symbud Myntri Rangbah.
U Symbud Myntri Rangbah u la ujor da ka ejahar halor halor kane ka jingjia bad ki pulit ki la pynrung mukotduma ïa kane bad pynlong ka jingtohkit.
Ki pulit ki ïathuh ba ki runar ki la kawang petrol bomb na surok bad u la dei ïa ka bynta ba shalor jong ka ïing. Ym shym la don kano-kano ka jingjulor jong ka ïing namar kane ka jingjia.
Haduh ba thoh ïa kane ka khubor, ym pat don mano-mano ba shah kem.
Kane ka dei ka jingjia kaba lai mynta u bnai ban shah kawang petrol bom.
Ka jingkawang petrol bom ka jia nyngkong ha Thanat Mawlai ha ka 3 tarik mynta u bnai ha kaba ka kali pulit kaba pynïeng ha phyllaw ka la julor.
Nangta bud sa ka jingkawang petrol ïa ka kali pulit kaba synran ïa uwei na ki ophisar ka NEEPCO kaba la jia ha Madanrting ha ka 24 tarik mynta u bnai.
Ka jingjia kaba lai ka dei ka jingkawang petrol bom ïa ka ïing ba sah u Symbud Myntri Rangbah ha Nongmensong ha ka step phyrngab mynta ka 26 tarik u Ïaïong.