Shillong, Naitung 26
Ka Nongaibuit ka Sorkar MDA bad MLA ka East Shillong, ka Dr. M. Ampareen Lyngdoh ha ka Sngi Saitjaiñ ka la pynpaw ïa ka jingsngewkhia halor ka jingbitar kaba nang kiew hapdeng ki samla ha kylleng ka ri bad kyntu ïa ka Sorkar Pdeng ban khmih bniah ïa ki shlem treikam ba ïadei bad ka pule-puthi.
Haba kren sha ki nongthoh khubor, ka Dr. Lyngdoh ka la ong ba ka “sngewsih shisha” haba phai sha ki jinglong-jingman ha ki bynta bapher-bapher jong ka ri.
“Nga sngewsih jur bad nga sngewkhia shi kat dei eh ban ïohi ba kane ka jinglynga ka la rung ha ka pateng ban wan jong kane ka ri kaba khraw kaba ngi khot ka India,” ka la ong.
Haba ïadei bad ki jingïakhih ba dang shen jong ki samla pule, ka la kdew ba watla ki don “ki jingbatai bapher-bapher haba ïadei bad ka aiñ bad ka jingpyntreikam ïa ka aiñ,” ki nongshong shnong samla kiba kwah ban kren eiei lehse kim shym la ïoh jaka bad ki la hap ban mad ïa ki jinghem ba harukom ha ki Jylla bapher-bapher.
“Nga tharai ba ka donkam ban don ïa ka jingbuh kyndon na ka bynta kane ka ri na ka liang ka Sorkar Pdeng halor kumno ban khmih bha ïa ki jingïakhih kiba kum kine,” la bynrap ka Dr. Lyngdoh.
Halor ka bynta ba ïadei bad ka jingkitkhlieh, ka la ong ba ha ka synshar paidbah, don kiba hap ban shim ïa ka jingkitkhlieh bad kaba sngewsih ka long ba ka la hap ha u Myntri HRD ha ka jingjia kaba dang shen.
Ka Dr. Lyngdoh ka la kyntu ïa ka Sorkar Pdeng ban khmih bniah ïa ka jinglah jong ki shlem pule, kiba laitluid kumjuh kiba dei jong ka Jylla, kiba pynlong ïa ki eksamin ha baroh kawei ka ri.
Da kaba kdew ïa ki jingbakla ba la ju jia man ka por ha kine ki khyndiat snem ba la dep, ka la ong ba ka jingshaniah ïa kine ki ‘test’ ka don ha ka jingma.
“Kine ki dei ki shlem treikam kiba kongsan bha. Kine ki dei ki eksamin kiba kongsan bha. Kane ka dei ka jingim jong ki samla pule kaba don ha ka jingma. Nga kwah ban ïohi ba kum kine ki jingbakla kin ym jia biang,” ka la ong.
Shuh shuh ka la ai jingmut ba dei ban peitngor bha ïa ki tnad pynïaid eksamin bad ban ai ka jinglaitluid ha ka ban pdiang ïa ki jingbakla da kaba shai, kynthup ban kubur lada don ka jinglait tuh jong ki jingkylli.
“Ym dei ban ailad ïa ki shlem ban treikam ha kane ka rukom, bad ngi hap ban pyntikna ba kan don ka jingtehlakam kaba pura ban pyntikna ba kaba kum kane ka jait kan ym mih satia,” ka la ong.
