Shillong, Naitung 26
Ha ryngkat ka jingnang kiew jong ki nongjngohkai pyrthei ha Sohra, ki dkhot ka Hima Sohra Tourist Assistant Team (HSTAT) ha ka Sngi Saitjaiñ ki la mih sha surok ban pynphriang ïa ka jingpynsngewthuh paidbah pyrshah ïa ka jingbret jaboh pathar bad ka jingshet bam ba khlem ïoh jingbit ha ki jaka paidbah.
Ki samla trei mon sngewbha ki la sam ïa ki kot lyngkdop sha ki nongwan jngohkai bad ki nongshong shnong, da kaba kyntu ïa ki ban kiar na kaba shet bam, ban bam ha ki rud surok bad ban bret jaboh pathar ha kane ka jaka lum baitynnad.
Ha kajuh ka por, la phah ïa ki kynhun pahara ban kyrpad ïa ki nongjngohkai pyrthei kiba la lap ba ki pynkheiñ kyndon ba kin mih noh na ki jaka ba la khang.
Ka Sohra, kaba pawnam na ka bynta ki kshaid ba noh rymphum, ki jingkieng-jri bad ki lum ba la tap da ki lyoh, ka ïai bteng ban long kawei na ki jaka jngohkai pyrthei ka Jylla kaba khring bha ïa ki nongjngoh kai.
Kane ka sienjam ka thmu ban pyntikna ba ka shnong kan bat ïa ka jingitynnad mariang jong ka hapdeng ka jingnang kiew jong ka jingwan tuid ki nongleit-nongwan.
Haba pynmih ïa kane ka jingkyrpad, ka HSTAT ka khot ka wer ïa ka jingïatreilang jong ki paidbah ban ïada ïa ka mei mariang.
“Ngi kyrpad ïa baroh ban ai ka jingïatreilang bad ka Hima Sohra Tourist Assistant Team da kaba kiar na kaba shet bam, ban bam ha ki rud surok bad ban bret jaboh pathar, khnang ba yn lah ban pynneh-pynsah ïa ka jingitynnad ka Sohra bad ka jingbhabriew jong ka,” la ong ka kynhun.
Ki nongpynïaid ki la pynkynmaw ba na ka liang ka Hima Sohra bad ka ophis Deputy Commissioner ka East Khasi Hills kham hashuwa ki la maham ïa ki nongjngohkai pyrthei ban ym pynjaboh ïa katei ka jaka.
Ki bor ba dei khmih ki la maham ba lada lap ïa kito kiba pynkheiñ ïa ki kyndon ka khuid ka suba kin ngat ha ka kuna kaba T. 5,000.
Ïa kane ka jingpynsngewthuh paidbah la ïalam da u President, Bah Alexon Diengdoh bad u Secretary, Bah Pynlang Shangpliang jong ka HSTAT.
Ka kynhun ka la ong ba kum kine ki jingpahara mon sngewbha bad ki jingpynsngewthuh paidbah kin ïai bteng ha ki taïew ban wan ban pynlong ïa ka Sohra kaba khuid bad kaba ki nongjngohkai pyrthei kin sngewtynnad ban wan.
