Shillong, Naitung 26
Ka jinghiar dor palat ki mar-rep khamtam eh u kubi, ka la pynlong ïa kiba bun ki nongrep ban mad ïa ka jingduhnong kaba khraw bad ha ki katto katne ki jaka, la sakhi ruh ba ki don ki nongrep kiba la shu ai ei lane shu bret noh ïa ki mar-rep namar ka jingbym don jingïohnong shuh ban die.
Haba ïadei kane u MDC ka Sohra Constituency bad u ba long ruh u General Secretary ka United Democratic Party (UDP) u Bah Titostarwell Chyne, haba ïakren sha ki nongthoh khubor ha ka 24 tarik u Naitung 2026, u la pashat ïa ki katto katne ki jingai jingmut bad ki sienjam ban weng ïa ka jingeh ki nongrep.
U Bah Titos haba pynpaw ïa ka jingsngewkhia ïa kane ka bynta u la kdew ïa ki bynta ba dei na ka Sorkar Jylla bad na ka Khasi Hills Autonomous District Council (KHADC) ban pyntreikam ban weng ïa ki jingeh ki nongrep.
Shuh-shuh u la kdew ba Sorkar Jylla ka don lypa ïa ka Meghalaya State Agricultural Produce and Livestock Marketing Promotion and Facilitation Act, 2020, kaba la thaw ban ïada bad ban kyntiew ïa ka bha ka miat jong ki nongrep ba kynthup ïa ki nongri jingri lyngba ki Market Committee.
U la ong ba ka Committee kan kynthup ïa u Chairman, Secretary bad ki dkhot kiba mihkhmat ïa ki nongrep bad ka kamram jongka, ka long ban peit bad pynïaid ïa ki ïew mar-rep, ban peit ïa ka dor ka mur bad ban pyntikna ba ki nongrep kin ïoh ïa ka dor kaba shong hok.
U la pynshai ruh ba hapoh katei ka Act ka don ruh ka bynta ban pyntreikam ïa ka Minimum Support Price (MSP) na bynta ki mar-rep. Ha kajuh ka por, u la kdew ruh ïa ka bynta jong ka Khasi Hills Autonomous District Council, da kaba ong ba ka Council ka don ïa ka Khasi Hills Autonomous District (Establishment, Management and Control of Markets) Regulation, 1979, kaba la pynkylla lyngba ka Second Amendment Regulation, 2021 bad la pyntreikam ruh da ka Market Rules, 2024.
U la ong ba katei ka Amendment ka ai bor ïa ka KHADC ban thaw ïa ki Market Committee ha ki ïew kiba hap hapoh ka jingpeit jong ka Council kata ban tehlakam ïa ka jingot-kilo bad jingkhñiot dor.
U la ban jur ba ka Sorkar Jylla bad ka KHADC ki dei ban ïatreilang ban pyntreikam ïa ki aiñ kiba don lypa, khnang ban ïada ïa ki nongrep bad ban pynthikna ba kin ïoh ïa ka dor kaba shong hok na ka bynta ki mar-rep jong ki.
