Khliehriat, Naitung 26
U Symbud Myntri Rangbah ka Jylla bad National Vice President ka NPP Bah Sniawbhalang Dhar haba ai jingïaroh ïa u Dr DRL Nonglait kum u briew uba la shemphang bha ha ka jingnang jingtip, u la kren ruh ïa ka longïing longsem jong u da kaba ong ka jingïatylli ka sdang na la ïing, bad ka NPP ka sngew sarong ban don ïa uba kum une u briew hapoh ka seng.
Ïa kane u Bah Sniawbhalang u la pynpaw haba kren ha ka jingïalang ïalap ilekshon ha ka 25 tarik Naitung hapoh ka Dorbar hall ka Elaka Sutnga, East Jaiñtia Hills district ban pan jingkyrshan ïa une u kyrtong ka NPP u Dr Nonglait na ka bynta ka ilekshon shiteng samoi sha ka Shillong Lokg Sabha.
U la ñiew ruh ïa u Dr Nonglait kum u briew uba sbun bad uba jynsur mynsiem, bad ong wat la u la jan shongthait na ka kam, hynrei u la pdiang ïa ka jingkitkhlieh ban mih ïakhun ïa kane ka ilekshon na ka bynta ka bha ka miat jong ka imlang sahlang, haba bynrap ba ka jingpynïasoh sha ka kam saiñpyrthei kam dei ka jingshim rai kaba suk.
U la ong ruh ba ha ka jingïaid lynti ka jong u ha ka kam saiñpyrthei dei tang ka Sutnga Saipung ka constituency kaba u la buh ïa u mawnongrim na ka bynta ka skhim kaba kot palat T.400 klur. U la ong ba kane ka T.400 klur na ka bynta kawei ka constituency kam dei kaba rit, bad ba ka MLA ka Sutnga Saipung ka la ïai dawa na ka bynta ki kam pynroi kaba la pynlong ïa ka Sorkar ban wanrah ïa bun ki projek ha kane ka thaiñ. Watla katta u la ong ba ka Saipung ka dang duna ïa ki kam pynroi ha ki katto katne ki jaka.
U Dr Nonglait ha ka jingkren u la ong ba u la ïakynduh ïa u Myntri Rangbah Conrad K Sangma bad ïa u Symbud Myntri Rangbah hashwa ba un pynïasoh sha ka NPP ban ïakren halor ki mat kiba donkam ban peit bniah bad ban ai jingmut halor ki policy na ka bynta ka jylla.
U la bynrap ba kine ki nongïalam ki la sngap ïa ki jingai jingmut jong u bad ki la ai mynsiem ïa u ban ïatreilang bad ki, bad hadien katto katne tylli ki jingïalang bad ki nongïalam ka NPP, u la rai ban pynïasoh sha ka seng.
Ka thong jong u Dr Nonglait ka long, “Ban pynbha, ban pynshai bad ban tei.” U la ong ruh ba u la pynïasoh sha ka kam saiñpyrthei ym na ka bynta ki jingïoh myntoi shimet-u dang don ha ka kam bad u la jan shongthait- hynrei u kwah ban shakri ïa ki paidbah bad ïa ka jylla kaba la pynlong ïa u ba un mih ban ïakhun ïa kane ka ilekshon shiteng samoi.
Katba ka MLA ka Sutnga Saipung ka Kong Santa Mary Shylla ha ka jingkren ka la ong ba naduh ba ka la shah jied kum ka MLA ka NPP, ka la wanrah shibun ki projek kam pynroi hapoh ka constituency. Ka la ai ruh ka jingïaroh ïa u Symbud Myntri Rangbah u Bah Sniawbhalang kum u briew uba duna ka ktien bad trei bun da ki kam. Ka la ai ruh ka jingïaroh ïa u Myntri Rangbah Conrad Sangma uba la trei shitom ban wanrah song pisa na ka Sorkar Pdeng bad ban wanrah ïa ki kam pynroi ha ka jylla.
Ha kane ka jingïalang la ïa don lang ruh u MDC ka NPP na JHADC, u Dolloi, ki nongïalam ka seng, ki nongtrei bad ki nongkyrshan jong ka seng nalor kiwei kiwei.
