Shillong, Naitung 26
Ka Hills Farmers Union (HFU) ka la pyntip sha ki nongrep ba ka la don ka jingkiew jong ka dor ka mur jong ki katto katne ki mar-rep kum u Kubi bad u Synsar.
U General Secretary ka HFU u Bah Allfondbirt Kharsyntiew u la ong ba ka Union ha kine ki sngi ka la ïa kynduh ïa u Commissioner & Secretary ka rep ka riang u Dr. Vijay Kumar bad ïa u Deputy Commissioner ka East Khasi Hills, ban pynsngew sha ki ïa ki jingeh haba ïadei ka dor jong ki mar-rep.
U Bah Kharsyntiew u la pynpaw ka jingsngewkmen ba ka jingïakren bad kine ki heh Sorkar ka long kaba seisoh ha kaba ka dor jong ki marrep jong u Kubi mynta ki la ïoh ban die T.10 bad ïa u Synsar ba shi nombor la lah ban die ha ka dor T.77 shi kilo naduh ki shnong ki jong ki.
U la ong ba ha kine ki lai snem, ki nongrep Synsar ki khlem ïoh ïa ka dor kaba pynim ïa ki nongrep, hynrei ha kine ki khyndiat taïew ki la don kiba thied ïa u Synsar ha ka dor 77 tyngka.
U Bah Kharsyntiew u la kyntu ïa ki nongrep ba kim dei ban die tad ïa u Synsar ba ki la pyllang baroh shi katta, hynrei ki dei ban da tip ïa ka dor ka mur. Ha kajuh ka por u la ai khublei ïa ki heh Sorkar kiba la shimkhia ïa kane ka mat haba ïadei bad u Synsar naduh ba don ïa ka skhim CM ASSURE.
“Ki nongrep jong ngi nangne shakhmat kin sa ïoh ïa ka dor ba bit ba biang bad ngi ngeit skhem ba kine ki dor ba mynta kim dei ban hiar noh shi sngi arsngi,” u la ong.
