Shillong, Naitung 26
Ka Commissionerate of Food Safety, Health & Family Welfare kala pynmih ïa ka jingmaham ha baroh kawei ka Jylla na ka bynta kane ka aiom lyiur, haba kyntu ïa ki paidbah ba kim dei ban bam tit khlaw bad ban pynthikna ba ki tyllong um ki dei ban lait na ki jingpynjaboh da ki kynja dawai.
Kane ka jingmaham kala mih hapdeng ka jingkiew ka jingngat bih na ka jingbam tit khlaw bad ka jingjur ka jingsngewkhia halor ki jingjaboh ki wah, ki wahduid bad ki umpohliew na ki kynja dawai ba tuid na ki jaka rep.
Ki ophisar kila ong ba ka jingkylla ha ka jinglong ka suiñbneng-ka jinghap slap ba bym thikna, ka jingkylla ka jingshit bad jingkhriat- kala pynkylla ïa ka jingheh jingsan ki tit. Wat ki tit ba ju ïabam ha Jylla ki lah ban don ïa ka bih.
“Kam don satia ka jingbatai kaba suk ban ong la u tit khlaw u long uba shngaiñ,” ong ka jingbthah. La kyntu ïa ki nongshong shnong ba kin kiar na ka jingleit kheit tit bad ban thied ïa u tit tang na ki jaka bala pynshisha bad ba shu rep.
Ka tnad kala maham ruh ïa ki nongrep bad ki nongshong shnong pyrshah ïa ka jingpyndonkam, ban sait lane theh ïa ki dawai pynïap khñiang hajan ki wah, ki wahduid bad ki umpohliew.
Da ka jingjur u slap, ki dawai ki lah ban tuid kloi kloi bad pynjaboh ïa ki umdih.
La bthah ïa u Deputy Commissioners, DMHO, BDO, Food Safety Officers, bad ki bor shnong ba kin pynsaphriang ïa kane ka khubor lyngba ki jingpynbna, jingïalap bad ki lad pynbna ba ki don ha shilynter ka lyiur.
Ka Sorkar Jylla kala kyntu ïa baroh ba kin bud ïa ki kyndon khnang ban lait na ki jingpang bad ïada ïa ka koit ka khiah u paidbah bad ki tyllong um ha kane ka por slap.
