Nongstoiñ, Ïaïong 25
Ka Hynñiewtrep National Youth Movement (HNYM) ka la lap ba ka Aradonga Secondary (Deficit) School kaba don ha khappud ka Meghalaya bad Assam ha ki thaiñ ka Athiabari jong ka West Khasi Hills District da ki phew snem mynta kam pat ju don wat tang uwei u nonghikai ha ka sobjek Khasi.
La ong ruh ba ha ka jingshisha ïa katei ka skul la seng naduh u snem 1962, hynrei kaba lyngngoh haduh mynta-mynne ym don wat tang uwei u nonghikai uba shim ïa ka sobjek Khasi.
Halor kane ka bynta, ha ka 25 tarik mynta u bnai ki dkhot ka HNYM Umsaitwait hapoh ka jingïalam u samla Fastmanrose Marshillong, President HNYM Umsaitwait Area ryngkat lang u Bah C Sohshang, President HNYM Mawshynrut Pyllun ki la pynlong ïa ka jingjurip ïa katei ka skul ban lap ïa ka jingshisha.
Ha katei ka sngi ka HNYM ka la ïoh ban ïakren bad u Chithung VG Momin, Headmaster ka Aradonga Secondary (Deficit) School uba la pynshisha ba ha katei ka skul kat haduh mynta-mynne ym don u Nonghikai ban hikai ïa ka sobjek Khasi ne ka MIL namar kam don kaba la thung kyrpang da ka sorkar Meghalaya.
U Headmaster u la ïathuh ruh ba na ka liang jong ka skul ka la dep ban pyntip ne ai jingthoh sha ki bor bahalor haba ïadei bad katei ka phang, phewse kat haduh mynta ym pat ïoh kano-kano ka jubab. Kumta kum u Headmaster da ka jingpyrshang kaba rit u la bthah ïa uwei na ki nonghikai uba dei u Khasi ba un shim kyrpang ban shim ïa ka sobjek Khasi katba don por ei kum shibynta ban ïarap ïa ki khynnah ha ka khim khait wat da kaba hikai palat ïa ka por long skul ne trei tam.
Halor kane ka kane bynta, ka HNYM ka pynpaw ïa ka jingbynñiaw kaba jur ïa ka jingbym shimkhia ki bor ba dei peit.
Ki nongïalam ka HNYM ki la ong ba shen kin sa leit ban ïakynduh ïa ki bor kiba dei khmih khnang ba ki para Khasi kiba sah ha katei ka thaiñ kin dup ïoh ka jingmyntoi.
