Nongstoiñ, Risaw 19
Iwei i heprit iba dang 8 snem ka rta, i la duh ei noh ïa la ka jingim hadien ba shah tynrah ha kawei ka trok katba i dang thmu ban mareh sha shiliang ka surok.
Katkum ka khubor, katei ka trok kaba la tynrah ïa i heprit ka dei kaba don ïa u registration number ML07-B-1437 bad la ong ruh ba katei ka jingjia kala jia ha ka por shiteng sngi jong ka 19 tarik u Risaw kata ha ka por kumba 1 baje eiei ha surokbah Nongstoiñ-Maweit kaba dang hap ruh hapoh u pud u sam jong ka shnong Risiang.
Haba pynthikna ïa kane, ki nongïalam ka shnong Risiang, West Khasi Hills ki la ïathuh ba itei i heprit iba la khlad noh i dei iba la tip kyrteng kum i Anisha Thyrniang, 8 snem ka rta, khun jong ka Kong ShaidalinThyrniang bad Bah Denis Mawdoh kiba napoh ka shnong Risiang ha WKHD.
Shuh shuh ki la ïathuh ruh ba halor kane ka jingjia na ka liang ka shnong kala pyntip sha ki pulit ha kaba na ka liang jong ki pulit ruh kila poi sha katei ka jaka ban leh ïa kaba donkam.
Ka khubor na u Superintendent of Police ka West Khasi Hills la ong ba la ïathuh ba itei i heprit ha ryngkat kiwei pat ki para khynnah lem bad u kñi jong i, ki dang thmu ban leit sha shnong hynrei ha katei ka por itei i heprit i la mareh sha shiliang ka surok khlem ka jingïarap u kñi, hamar kata ka por la wan ka trok thylli bad la ong ruh ba u nongñiah jong ka trok u la pyrshang ban kiar ban pyllait hynrei um lah tehlakam shuh ha kaba ka taïar nakhmat kaba sha kadiang kala dei ïa itei i heprit haduh ba in da khlad noh.
Na ka liang jong ki pulit kila pynlong ka jingtohkit bniah bad ïa ka met basah jong itei i heprit la pynkit noh sha Civil Hospital Nongstoiñ ban pyndep ïa ki jingdonkam baroh.
