Shillong, Risaw 19
U MLA ka Mawkyrwat Constituency u Bah Renikton Lyngdoh Tongkhar u la ong ba ka jingthmu jong u ban leit pynïasoh sha ka National People’s Party (NPP) ka long namar ba ki nongkyrshan jong u ki la pynpaw ka jingsngewhun ïa ka jingsynshar bad ka jingtreikam jong ka Sorkar Meghalaya Democratic Alliance (MDA).
U Bah Renikton u ba la sdang kum u MLA jong ka Hill State People’s Democratic Party (HSPDP) bad hadien pat u la pynïasoh sha ka UDP da ka jingthmu ban pynïatylli ïa ki seng riewlum, u la aiti ïa ka kot jingpynïasoh sha ka NPP ha ryngkat u MLA ka West Shillong u Bah Paul Lyngdoh bad u MLA ka Mowkaïaw u Bah Nujorki Sungoh, hakhmat u Lamphang ka Ïingdorbar Thawaiñ u Thomas A. Sangma.
Haba kren sha ki nongthoh khubor u Bah Renikton u la ong, “Nga lah ban kren katto katne, ka jingtreikam jong kane ka Sorkar MDA-I bad MDA-II, ka la pynlong ïa nga ban shim ïa kane ka rai. Ym tang ma nga, hynrei ki briew jong nga ruh kumjuh. Phin sngewkmen ban tip ba nga la leh ïa kane hadien ba ki briew jong nga ki la dep shim ïa ka rai. Kumba phi la ïohi, kiba bun ki paidbah ka Mawkyrwat ki la leit ban pynïasoh sha ka NPP”.
“Kum u nongïalam uba ngeit ba u donkam ïa ki nongbud jong u, nga ruh nga bud ïa ki khnang ba ki ruh kin bud ïa nga,” u la bynrap.
Haba pynkynmaw halor ka jingthmu jong u mynshwa kata ban pynïatylli ïa ki seng riewlum, “Ngi la pyrshang ban leh ïa kaba bha tam ban pynïatylli ïa ki seng riewlum. Kumba phi kynmaw bha, ha kata ka por ha ka kyrteng jong ka RDA ngi la pyrshang katba lah, hynrei phi ruh phi la ïohi ba ngim shym la jop,” la ong u Bah Renikton.
“Namar kata ka daw la ïohi shai ba lada ngi kwah shisha ban pynkhlaiñ ïa ki seng saiñpyrthei jong ngi, kaba la ïalam da ki briew jong ngi, tang kawei ka lad bad kata ka dei ka NPP” u la ong.
Haba bynrap u la pynpaw ka jingsngew sarong ban ong ba ka NPP ka dei ka National Party kaba la ïoh ka jingithuh ha ka Ri, hynrei ka dei ka seng kaba la ïalam da ki briew kiba na ka Jylla bad ong ba kane ka long shisha ka jingsngew sarong.
