Shillong, Risaw 19
U Dr. D.R.L Nonglait uba dei u kyrtong ka NPP ban ïakhun ïa ka ilekshon MP shiteng samoi na Shillong Parliamentary Konstitwensi u la pynpaw ïa ka jingkyrmen bad jinghun jong ka jingmih jong ki paidbah ban pyni ïa ka jingkyrshan ka jong ki ïa u ha manla ki jingïalang paidbah kaba u leit ban ïalap.
“Nga la leit sha 36 tylli ki konstitwensi ha Rilum Khasi bad Jaiñtia ban ïalap bad ban pan jingkyrshan na ki paidbah na ka bynta ka ilekshon MP shiteng samoi ka ban sa long shen,” u la ong.
U la ïathuh ba ha man ki jingïalang u itynnad bha ba ki paidbah ki wan ai mynsiem bad ai jingkyrshan wat haba um shym la khmih lynti ban ïoh jingkyrshan kaba kum kane na ki paidbah. Kumta u la pynpaw ba ki briew ki don ka jingsngewjan bad ka jingshaniah ïa u. ‘Nga ihun bha ïa ka jingkyrshan u paidbah bad nga sngewnguh shisha ïa ka jingkyrshan jong ki bad nga don ruh ïa ka jingsngewskhem ba ngan ïoh ïa ka jingjop ha kane ka ilekshon MP,” u la ong.
Ïa kine ki kyntien u la kren sha ki lad pathai khubor hadien ka jingïalang bad ki samla pule kiba la shah hikai ha u ban ai mynsiem ïa u ban ïakhun ïa kane ka ilekshon.
Ha kawei pat ka bynta, u Dr. D.R.L Nonglait u la ong ba kylleng ka pyrthei ki ïapbiej ïa ka jylla Meghalaya kumta donkam ban kyntiew ïa ka kam jngohkai pyrthei ha kajuh ka por ban peitngor ruh ba kiba wan nabar kim dei ban wan leh trai khlieh ha ka Jylla.
Ka spah mariang ba don hangne ka dei ban long ka jingkyrkhu nyngkong ïa ki paidbah ka Jylla ym ïa kiba nabar, u la ong bad bynrap ba ka jinglaitluid ha ka jingngeit dei ban pynneh pynsah.
Haba kren halor ka ILP u Dr. Nonglait u la ong ba donkam ban buddien ïa ka haba baroh ki seng saiñpyrthei ha ka Jylla ki la mynjur ïa ka.
