Shillong, Risaw 19
U Bah Ardent Miller Basaiawmoit, President ka Voice of the People Party (VPP) u la ong ba ki paidbah kiba jied ïa ka seng riewlum, dei ba ki ieid, ban ong “Dei tang kane ka seng kaba ïada hynrei mynta ka la long kumba lehkai ‘Ludo’ kiew jingkieng bad shah nguid bseiñ”.
U la ong ba don ki party kiba la shah nguid bseiñ bad don ki party kiba la ïoh kiew jingkieng ha kane ka khep ba mynta.
Ïa kane u Bah Ardent u la kdew ba ka United Democratic Party (UDP) kaba don 12 ngut ki MLA, la sah satang 4 ngut bad mynta yn sah sa tang u wei u MLA bad ka don ka jingshah nguid bseiñ kaba shyrkhei.
Shuh shuh u la kdew ruh, ba ka party BJP kaba don tang 2 ngut ki MLA, mynta pat ka la shu kiew jingkieng 10 ngut.
Ïa kane u Bah Ardent u la kren ha ka jingïalang pdiang sngewbha ïa u Bah George Sun ha ryngkat ki spah ngut ki nongkyrshan, uba dei na ka Congress uba la ïakhun ïa ka ilekshon MDC ba la dep, ha ka jingïalang ba la long ha Mawngap.
“Kine kidei kiei-kiei kiba ka VPP ngim kwah, ba kin nangïai jia. Namarkata ngi ong ïaphi ki paidbah ba ka party jong ngi, kadei ka party kaba pher bha bad ki paidbah kiba don bad ka party jong ngi, ki dei ban neh ha kata ka nongrim,” la bynrap u Bah Ardent.
