Shillong, Risaw 19
Hashuwa ba u Myntri Rangbah ka Jylla, u Conrad K. Sangma un leit jngoh ïa ka Chokpot bad Siju ha ka 21 tarik Risaw, ka ASONG Southern Zone, Baghmara ka la kyrpad ïa u ba un leit lyngba ka surok ha ka jaka ban pyndonkam da ka ‘Helicopter’.
Ka seng ka la ong ba ka jingpyndonkam ïa ka ‘Chopper’ ka mut ba yn sa ïaid lait noh ïa ka jinglong-jingman ba i-sangsot jong ka surok kaba ki nongshong shnong ki mad man ka sngi.
Da kaba pynpaw ba ka pyrshah jur ïa ka jingthmu ba ïadei bad ka ‘Helicopter’, ka ASONG ka la ong, “Ka jingher na suiñ nalor kine ki jaka ka ïaid lait lut ïa ki jingjynjar ba man ka sngi kiba ki nongshong shnong ki mad namar ka jinglong-jingman jong ki surok jong ngi kiba la jot rathai.”
Ka seng la ong ruh ba u Myntri Rangbah ka Jylla u dei ban ïohi hi dalade ïa ka jingshisha.
“Ngi kyrpad kyrkieh ïa u Myntri Rangbah ka Jylla ban leit lyngba ka surok, ban leit jurip ïa ka jingshisha bad ban mad hi dalade ïa ka jingdonkam ba kyrkieh ban maramot bad pynroi ïa ki jingtei ha ka konstitwensi jong ngi,” la ong ka ASONG.
