Shillong, Risaw 19
U Bah George Sun, u kyrtong MDC na ka Congress ha ka ilekshon ba la dep, uba dei ruh u Secretary barim ka East Khasi Hills District Congress Committee, ha ka 19 tarik u Risaw 2026, u la pynïasoh ïalade bad ka Voice of the People Party (VPP) ha ryngkat ki spah ngut ki nongkyrshan, ha ka jingïalang pdiang ha Mawngap.
Haba kren ha kane ka prokram pynïasoh, u Bah George u la ong “Ngam rung sha ka VPP tang ban ïoh tiket hynrei ka shong ha ki nongïalam ka seng kumno ban leh”.
“Lada ka party ka ibit ïa nga, nga long ba la kloi, bad lada don uba kham biang shuh-shuh ruh, ngan dang trei ban pynthikna ba ka VPP ha u snem 2028, kan jop na Mawphlang,” u la ong.
U Bah George u la ong ruh ba bun ki la ngiah ïa ka politik, namar ka jingshah shukor palat ha ki seng saiñ hima sima, hynrei ka wan biang ka jingkyrmen na bynta u paidbah na ki nongrim ka VPP.
U la ong ba ka nongrim jong ka VPP, halor ‘ Ban pynim pat, ‘Ban pynkylla dur.’ bad ‘Ban pynbha pat, kine kidei ki lai tylli ki mawbyrsiew kiba ki nongïalam ka seng ki ïohi jngai na bynta ka jingbha jong ka jaidbynriew. “Dei halor kita ki nongrim ba nga sa wan ban pynïasoh noh bad ka VPP.”
Ïa u Bah George Sun ryngkat ki nongkyrshan jong u, la pdiang sngewbha da u Bah Ardent Miller Basaiawmoit, President ka VPP, ha ka jingdon lang ki nongïalam ba hakhmat ka seng ruh kumjuh.
