Shillong, Ïaïong 26
Ka long shisha kaei-kaei kaba isaitmet ban peit da la ki jong ki khmat ïa ka jaka sah ki poiwir ha Lum Survey kaba don hajan ka shlem treikam ka Fire & Service ha Ïewduh kaba dang hap hapoh ka jingpeit jong ka Shillong Cantonment Board. Ha kane ka jaka la ïohi ruh ïa ki jaboh kiba shyrkhei na ka jingbret pathar ïa ki plastik bad ki jaboh-jabaiñ bad kane ka la pynlong ba kan don ka jingsma iwtung kaba haduh katta-katta wat haduh u pud ban nym lah satia ban ïeng slem ha katei ka jaka.
Kane ka paw pyrthei hadien ba ka Hynñiewtrep Youths’ Council (HYC) ka la leit ban jurip kynsan ïa katei ka jaka sah ki poiwir kiba la wan na kiwei-kiwei ki jylla ban buhai shnong ha katei ka jaka. Nangta lah ruh ban ong ba kine ki poiwir kiba sah ha katei ka jaka ki la im lang ha ryngkat bad ki jaboh-jabaiñ kiba buh jingma wat ïa ka koit ka khiah ruh.
La sakhi ba ki tnum ïing ha kane ka jaka kaba rit kim duna ïa ka 80 haduh 100 tylli bad ka long kaba khapngiah haduh katta-katta wat ha kawei ka kamra kaba rit ruh ki ïa sah lang kumba 20 ne 30 ngut eiei ki briew.
Ha ka jingjurip ka HYC ha ka 25 bad ka 26 tarik u Ïaïong, la lap ba wat ha katei ka jaka kaba rit, hynrei ka la don ruh kawei ka skul ka ban ai jinghikai ïa ki khynnah kaba la tip kum ka Spark School. Kaba kham lyngngoh shuh shuh ka long ba wat hapoh kane ka skul ki don ki jaiñ, ki nep, ki jingthiah namar ki don ki briew kiba sah.
