Nongpoh, Ïaïong 26
Uwei u briew uba la shah kem ha ka 24 tarik Ïaïong, 2024 u la khlad noh ha ka step Sngi Thohdieng da kaba phasi ïalade hapoh ka along kaba don ha thanat Khanapara ha Ri Bhoi.
Haba pyntip ïa kane mynta ka sngi, u SP ka Ri Bhoi, u Jagpal Singh Dhanoa, u la ong ba ha ka 24 tarik Ïaïong ki pulit ki la kem ïa uwei u briew ïa uba la ithuh kum u Rudra Rabha hapoh ki kyndon jong ka aiñ Arms Act bad Indian Penal Code (IPC).
Nalorkata, u Dhanoa u la ong ba ha ka 25 tarik Ïaïong, la rah ïa u Rabha sha ïingbishar bad ka ïingbishar ka la ai lad ïa ki pulit ba kin tohkit ïa u na ka bynta san sngi.
U SP u la ong ba ha ka jingtohkit ki pulit ïa u Rabha, u la ïathuh ba u la buhrieh ïa kawei ka tiar siat ha khlaw bad u la pynpaw ïa ka jingkwah ban ïalam ïa ki pulit sha kata ka jaka. Na ka liang ki pulit, da ka jingïalam lynti jong u Rabha, ki la ïoh ïa kata ka tiar siat na ka khlaw ha Ranibari ha ka jingdonlang ki sakhi.
Hadien ba la dep ïa ki kam ki jam mynta ka step, la wanrah ïa u Rabha sha thanat Khanapara ha ka por kumba 1:05 eiei. U SP u la ong ba la hap ban set ïa u Rabha ha thanat Khanapara namar ka Rani Jirang Border Outpost kam don jaka set ïa kiba shah kem.
Hynrei u SP u la ong ba ha ka por 4 baje mynne mynstep, u nongap pahara ha katei ka thanat ha Khanapara u la lap ba u Rabha u la dkhat ïa la ka jingim da kaba phasi ïalade ha along kaba don ha thanat. U SP u la ong ba u Rabha u la sdien ïalade na ki nar kiba don ha along da kaba pyndonkam da ki jaiñ kiba la suba ba u la tar na ka nep ba la ai ha u.
Na ka liang u Executive Magistrate na ka shlem u Deputy Commissioner ka Ri Bhoi u la leit sha katei ka thanat ban pynlong ïa ka jingpeit bniah ha ka jingdon lang u doktor bad kiwei.
U SP u la ïathuh ba ha kaba ïadei bad katei ka jingjia ki pulit ki la pynrung da ka jingujor ha thanat Nongpoh bad ka jingtohkit ka la sdang.
Ka jingshah kem jong u Rabha ka don ka jingïadei bad ka jingjia ha u bnai Lber mynta u snem ha kaba ki pulit ki la ïoh kem ïa arngut ki khynnah kiba dang 18 snem ka rta hadien ba ki la siat da ka suloi ïa ki pulit ha ka khlaw kaba don ha ka shnong Ranibari.
Ha u kyrwoh khubor ha kato ka por, u SP ka Ri Bhoi u la ïathuh ba ki pulit ki la ïoh jingtip ba ki la don ki briew kiba la rah suloi bad kiba ïaid hajan ka khlaw ha ka shnong Ranibari.
Mar ïa ïoh ïa kane ka jingtip, ki pulit na Ranibari Border Outpost ki la leit sha katei ka jaka. Ha ka por ba ki pulit ki la rung sha khlaw, kita kiba rah suloi ki la siat sha ka kynhun pulit, la ong u SP.
Hynrei u SP u la ong ba namar ba don ki khynnah bad ki kynthei hajan, ki pulit ki khlem siat kylla bad ki la leit beh thong ban ïoh kem ïa ki.
Ha ka jingthwet, ki pulit ki la ïoh kem ïa arngut, uwei u shynrang bad kawei ka kynthei bad kine baroh arngut ki dei kiba dang 18 snem.
Ha ka jingtohkit, u SP u la ong ba kitei ki arngut ki dei ki dkhot jong ka kynhun ki runar ba donkti ban tuh ïa ki dieng sal, kwai, ar shaka bad kiwei.
U SP u la ong ba u nongïalam jong katei ka kynhun ki runar u dei uba la tip kyrteng kum u Rudra Rabha.
Nalorkata, ha ka por ba ki pulit ki la leit ban khynra ïa ka ïing jong utei u khynnah uba la shah kem, ki la ïoh kurup ïa kawei ka suloi SBML ryngkat u Gunpowder ba pyndonkam kum u kuli.
Na ka liang ki pulit ki dang bteng ban khynra ha katei ka jaka ban wad shuh sa ïa kiwei pat ki runar. Ha kajuh ka por, u SP u la ong ba la pynrung da ka ejahar ha thanat Khanapara hapoh ki kyndon aiñ.
