Shillong, Ïaïong 26
U MLA ka UDP na West Shillong Constituency, Bah Paul Lyngdoh uba dei ruh u Myntri ha ka Sorkar Jylla, u la ong ba ka UDP kan nym kob, hynrei kan ap beit haduh ka 4 tarik u Jylliew kaba dei ka sngi ban ñiew ïa ki ‘vote’ kaba ki paidbah ka Shillong Parliamentary Constituency ki la dep thep ha ka 19 tarik u Ïaïong.
Haba ïakren bad u Bah Paul Lyngdoh u la ong ba ïa mynta ka seng kam pat lah ban ai jingkheiñ la u kyrtong u jop ne u rem hynrei ka UDP kan ap beit haduh ka sngi ba ñiew ïa ki ‘vote’.
Ym tang ka UDP kam shym la ïoh jingkheiñ, hynrei wat ka NPP kaba ïalam ïa ka sorkar jylla ruh kam shym la ïoh jingkheiñ.
Na baroh ki seng saiñ-pyrthei dei tang u MLA ka Congress na Umsning Constituency, Dr. Celes-tine Lyngdoh uba la kam ba u kyrtong ka Cong-ress, Bah Vincent Pala un jop biang ha kane ka ilekshon MP Lok Sabha. Katba u MLA ka BJP, Bah A.L Hek bad u MLA barim ka NPP, Bah Hamlet Dohling ki la kam ba ka jingïakhun mynta ka long hapdeng ka NPP, Congress bad ka VPP.
Ki kyrtong kiba ki paidbah ki la dep rai ha ka 19 tarik u Ïaïong ha Shillong Parliamentary Constituency ki don hynriew ngut. Kine ki long ka Kong Ampareen Lyngdoh na ka NPP, Bah Vincent Pala na ka Congress, Dr. Ricky AJ Syngkon na ka VPP, Bah Robertjune Kharjahrin na ka UDP lem bad ar ngut ki kyrtong shimet, Bah Lakhon Kma bad u Bah Peter Shallam.
