Khliehriat, Ïaïong 26
Ka Khasi Students’ Union (KSU) Narpuh bad KSU East Jaiñtia Hills District Unit ha ka 26 tarik Ïaïong ki la leit ban tur shajan ka jaka buh khyrdop ka BSF ha Sonapyrdi.
Kane ka jingleit tur jong ki dkhot ka KSU ka long hadien ka jingbitar ba shah shoh shah tied dangshen jong ki ‘riew paidbah ha ki shipai BSF kiba shong pahara ha Sonapyrdi.
Ha kane ka sngi la ïadonlang ki nongïalam shnong bad ki nongshong shnong ba shah ktah naduh Hingaria, Umstein, Sonapyrdi bad kiwei kiwei ki shnong.
U nongïalam ka KSU, Bah K.S Suchiang haba kren ha ka jingïalang, u la ong ba ka sorkar ka dei ban kynriah mardor ïa ki BSF na Sonapyrdi shuwa ban jia kaei-kaei kaba sniew namar ki long ki mawjynthut ïa u paidbah bad bynrap ruh ba ki BSF ha ka jaka ba kin ai jingshngaiñ ïa ki paidbah, ki ktah kti bad thombor kylla ïa u paidbah ba ïaid ba ïeng ha kane ka jaka.
“Ka KSU na ka por sha ka por ka ujor sha ki bor district bad sha ka sorkar ban kynriah ïa ki BSF na Sonapyrdi, hynrei haduh mynta kine ki shipai ki dang neh bad pynthut ïa ka shongsuk-shongsaiñ u paidbah ka thaiñ Narpuh bad ki shnong khappud,” la ong u Suchiang.
Nalor nangta, u la ïathuh ruh naduh ki khynnah skul, ki ‘riew kynthei ki la shah thombor ha ki BSF bad ki mar bam jong ki paidbah ki la sniew na ka jingkhynra khlem nongrim ki BSF tang ban pyndik ïa u paidbah, katba ki kam sniew ha khappud ki ïai jia, hynrei ka BSF kam lah satia ban tem ïa ki kam sniew ha khappud India-Bangladesh.
U la buh jingkylli ruh ïa ki BSF ki la leh aïu halor ka jingshah pynïap ka longkmie ha Donaskur bad u (L) Sylvanus (Chiang) Dhar. Kumta ka bha ïa ki ban shong sha khappud ym ha ki jaka paidbah. Katba u Waheh Shnong Sonapyrdi, Bah E Lamare, u la ther tyngeh ïa ki BSF da kaba buh jingkylli, hato kim lehraiñ ban thombor ïa ki briew kiba ïaid ba ïeng? U la buh jingkylli ruh mano ba ai jingbit ïa ki ban buh khyrdop ha katei ka jaka, haba na ka liang ka shnong kam shym la ai jingmynjur.
“Lashai ka sngi phi dei ban pynkynriah ïa kane ka khyrdop bad ha surok phi don ka bor ban khynra phi lah ban leh, hynrei kynriah ïa ka khyrdop mardor lashai hi ka sngi,” la ong u Bah Lamare bad bynrap ba ka tnat pulit bad ka bor district ki dei ban pynkynriah.
“Phi (BSF) phi dei ban lehraiñ ha ka jaka ba phin ai jingïada ïa ki nongshong shnong, phi pynthut pynban ïa u paidbah bad ka shongsuk-shongsaiñ,” la ong u Bah Lamare.
Kumta ki dei ban mih mar-mar na katei ka jaka, bad u la ban jur ba ka bor district ka dei ban shim ka jingkitkhlieh ban leh eiei ban kynriah ïa ki BSF na Sonapyrdi.
Ha kane jingïalang la donlang u President ka KSU, East Jaiñtia Hills District Unit, u Streamly Nongjop Suchen bad kiwei kiwei ki nongïalam KSU, nongïalam shnong bad nongshong shnong ka thaiñ Narpuh.
