Shillong, Ïaïong:
Ka jingkynrei ki jingjia shah tuh ha kylleng ka nongbah Shillong ka la long haduh katta-katta ha kaba ha kawei ka jingjia shah tuh kaba la jia ha ka 22 tarik mynta u bnai ha ka por kumba 4:30 janmiet, ki nongtuh ki la ïoh ban rong tuh ïa kawei ka Mobile Phone IPhone kaba don ïa u IMEI Number 35035561-9769676 napoh kawei ka dukan die mobile kaba la tip kum ka Mobile Store JS Enterprise kaba don ha Laitumkhrah, Shillong kaba don markhap bad ka thanat Laitumkhrah.
Halor kane ka jingshah tuh, u Vishal Pandey uba dei u trai jong katei ka dukan, ha ka Sngi Ba-ar mynta ka taïew u la leit ban mudui da ka ejahar ha thanat Laitumkhrah halor kane ka jingjia.
Ïa katei ka jingshah tuh jong kane ka Mobile Phone la ïoh ban ring dur lut nadong-shadong lyngba ka kor ring dur (CCTV Camera) ba la pyndait hapoh kane ka dukan ha kaba ha katei ka dur khih la ïohi ruh ïa ka dur jong ki lai ngut ki briew kiba donkti ha kane ka kam tuh.
Ha kawei pat ka jingshah tuh, ki trai jong ka dukan kaba la tip kyrteng kum ka Esmasa Collection kaba don ha Laitumkhrah pyrshah bad ka Ïing Dak kaba la long trai da ka Kong Koridian Wahlang ki la pyntip ba ki don lai ngut ki briew kiba la wan ban tuh ïa ki shatri na katei ka dukan. Katba ki nongtuh ki dang tuh ïa ki shatri, u trai jong katei ka dukan u la ïoh ban bat, bad na ka liang u trai katei ka dukan u la ai jingsneng ba kim dei shuh ban dang ïai mlien ban tuh.
Kitei ki trai dukan ki la ïathuh ba ka jingshah tuh jong ki na ka dukan ka la jia ha ka 17 tarik Ïaïong, 2024 ha ka por 3:45 noh phai sngi. Ki la ïathuh ba kine ki lai ngut ki nongtuh ki dei kijuh ki briew kiba donkti ban tuh ïa ka Mobile Iphone na ka dukan die mobile JS Enterprise kaba don ha Laitumkhrah.
