Shillong, Ïaïong 26
Ka Hynñiewtrep Youths’ Council (HYC) hadien ba leit jurip ïa ka jaka sah ki poiwir kaba don shadien ka Them Metor ha ka 25 tarik Ïaïong ka lap ba ka la don ka jingtan tuh ïa ka bording ha ka jaka sah jong kine poiwir kaba la tip kum ka Lum Survey kaba don hajan ka shlem treikam ka Fire & Service ha Ïewduh kaba dang hap hapoh ka jingpeit jong ka Shillong Cantonment Board (SCB). Kumta ha ka sngi kaba bud ka 26 tarik u Ïaïong, ka HYC ka la leit ban ïakynduh ïa u CEO ka SCB, u Ayush Maurya, IDES bad buh ruh da ka jingthoh ban dawa weng noh ïa ki briew kiba sah beaiñ ha katei ka jaka khlem ka jingïoh bor na katei ka tnat treikam.
Haba kren sha ki lad pathai khubor hadien ka jingwan ïakynduh ka seng ïa u CEO, u President ka HYC, u Bah Roykupar Synrem u la ong ba ka jubab kaba ka seng ka la ïohpdiang na u CEO ka long ba katei ka jaka ka dei shisha kaba hap hapoh ka Shillong Cantonment Board, hynrei hapoh ka Shillong Cantonment Board ki don sa kiwei pat ki tnat bad ki bor kiba peit ïa kitei ki jaka.
Nalor nangta, u Bah Synrem u la ong ba utei u CEO u la ong ba katei ka jaka ka don hapoh ka jingïaleh mukotduma hapdeng ki arliang mamla ban weng ïa kitei ki briew kiba sah beaiñ ha katei ka jaka.
U CEO u la kyntu ïa ka seng ba lada ki kwah ban tip kham bniah halor kane ka jaka ki dei ban leit sha ka shlem treikam u Defence Estate Officer (DEO) kaba don sha Guwahati.
“Ban tip kham bniah ïa kata, u la ong ba ngi hap ban leit ne ban ïakynduh sha ka shlem treikam u DEO kaba don ha Guwahati”, la ong u Bah Synrem.
Na ka liang ka seng ka la ong ba ka jingthoh ba ka seng ka la ai ha ka Cantonment Board, kane ka tnad ka dei ban ai jubab ïa ka seng khnang ba ka seng kan ïoh jingshai bad ba kan leit mih ban ïoh ïa ka jingshai na kita ki bor.
“Ngin ap ïa ka jubab kaba ngin ïoh na ka Cantonment Board bad hadien kata ngin sa leit ban ïakynduh ïa u DEO la u don ha Guwahati ne u don hangno-hangno ruh hynrei ngin sa pynbeit pat ïa ka seng bad ngin sa ai jingthoh ïa ki bor ba dei peit”, la ong u Bah Synrem.
Kum ban pynkynmaw, ka HYC ha ka jingleit jurip ïa ka jaka sah ki poiwir ha Lum Survey, ka la lap ba ki briew kiba sah ha kane ka jaka ki la shong ha ki ïing rit ba tap da ki plastic. Kaba sngew lyngngoh ka long ba ki sah haduh kumba 20 bad 30 ngut ha kawei-pa-kawei ka ïing rit bad ki la don haduh palat 80 tylli ki ïing ba la pynïeng da kine ki poiwir.
