Nongstoiñ, Ïaïong 26
Ka la shim katto-katne por ïa ki pulit ba kin lap bad ïoh sei ïa ka met jong uwei u rangbah kaba la suba jur na ka ngam jyllop ha kawei na ki bynta jong ka wah Nonbah kaba la tip kum ka Wahriat kaba don hapoh ka sor Nongstoiñ, West Khasi Hills .
Ka khubor ka ong ba katei ka jingjia ka la jia ha ki por 10 baje mynstep jong ka Sngi Thohdieng jong ka taïew.
Nalor nangta, ka khubor na ki heh pulit ka District la ong ruh ba ïa utei u briew uba la ngam jyllop la tip kyrteng u Moris Kharbani, 36 snem eiei ka rta na ka shnong Mawrusyiar, West Khasi Hills .
Kat haduh ba thoh ïa kane ka khubor ym shym la tip kaei ka daw kaba pynlong ïa ka jingngam jyllop jong utei u briew ha katei ka wah.
Halor katei ka jingjia, ki pulit ka Nongstoiñ ha ryngkat ki pulit na ka tnat pynlip ding Nongstoiñ hadien ba ïoh jingtip ki la hiar sha katei ka jaka ha kaba ka la shim por kham slem ban ïoh sei noh ïa ka metïap jong utei u rangbah.
Shuh shuh ka khubor na ki pulit la ong ruh ïa ka metïap jong utei u rangbah la pynkit noh sha Civil Hospital Nongstoiñ ban pyndep ïa ki jingdonkam baroh.
