Shillong, Ïaïong 26
Ka Hynñiewtrep Youths’ Council (HYC) ha ka Sngi Thohdieng ka la leit biang sa shisien ban hiar sha ka jaka sah jong ki poiwir kaba la tip kum ka Lum Survey kaba don hajan ka shlem treikam jong ka Fire & Service ha Ïewduh kaba dang hap hapoh ka jingpeit jong ka Shillong Cantonment Board hadien ba ka seng ka la lap ïa ka jingsah beaiñ jong kitei ki briew bad ka jingdon ka jingring tuh ïa ka bording ilektrik.
Ka seng ha ryngkat ka Investigation and Enforcement Sub-Division Shillong Circle jong ka tnat MEeCL ha katei ka step ki la hiar ban tohkit bad jurip ïa katei ka jaka ha kaba ki la lap dalade ba ka la don jingshisha ka jingtuh ïa ka bording ilektrik ha katei ka jaka bad mar kumta ka tnat MeECL hapoh ka jingïalam u Assistant Executive Engineer, u Bah Yupher Passah ki la leit ban jynrat naphang ïa ki waïar bording ilektrik. Ha kajuh ka por u la kdew ba na ka Building Ajmera Marbles ka la don ka jingai bording tuh sha kawei na kine ki longïing kaba ym ïahap satia bad mar kumta ki la ot noh ïa kitei ki waïar
Haba kren sha ki lad pathai khubor, na ka liang u President ka HYC, u Bah Roykupar Synrem u la pynpaw ba kum ka seng ka dap da ka jingsngew diaw ba ki bor ka MeECL bad ki bor ka sorkar ki sdang ban kyndit bynriew tad ynda ba ki sengbhalang ki pyni ïa ki jingduna kiba kum ka sorkar ka dei ban tip bad ban pyndep ïa la ka kamram kaba ka dei ban leh.
“Kam dei shuh ka kamram jong ngi ban ong ne kyntu ïa ki ba kin leh ïa la ka jong ka kamram hynrei kaba sngewsih ka long ba tad haduh ynda ki sengbhalang ne ki riew paidbah ki pyni ïa ka jingduna jong ki, ki bor sorkar ki sdang ban kyndit thiah bad kane ka long kaei-kaei kaba na ka liang jong ka seng ngim lah ban pdiang”, la ong u Bah Synrem.
U Bah Synrem u la ong ba seng ka la kyntu ïa ka MeECL ba ka dei ban kyndit thiah bad ban kitkhlieh ïa la ka jong ka kamram ym dei tad haduh ba ka seng kan da pyni ïa ki jingduna. Ka seng ka la kyntu ruh ïa ka MeECL ba ka dei ban pynshitom ïa kiba ring tuh ïa ka bording ilektrik bad kaba dei ban ai tang ïa kiba siew pisa.
Shuh shuh u Bah Synrem u la ong ruh ba ka tnad MeECL ka dei ban pynlong da ka jingtohkit halor kane ka jingring tuh ïa ka bording ha katei ka jaka bad ba dei ban pynshitom ïa kiba donkti halor kane ka kam la ka long u Metre Reader ne u Line Man ruh.
“Ngi sngew ban kyntu ïa ka MeECL ba ka dei ban pynlong da ka jingtohkit ïa kane ka jingjia khnang ban pynshitom ïa kito kiba ai tuh ïa ka bording ne la ka long ka jingdonkti jong u Line Man ne la ka long ïa u Metre Reader, lada lap ba ki leh bad don bynta lang ban ai tuh ïa ka bording, ka MeECL ka dei ban shimkhia halor kine ki briew kiba donkti”, la bynrap u Bah Synrem.
Na ka liang ka tnad MEeCL ka la pynpaw ba kane ka jingleh jong kitei ki briew ka long kaba beaiñ bad kum ka tnad kan sa kitkhlieh nangne shakhmat ba kum kine ki jingjia tuh bording ilektrik kan nym ïai jia shuh nangne shakhmat.
Kum ban pynkynmaw, ka HYC ha ka jingleit jurip ïa ka jaka sah ki poiwir ha Lum Survey, ka la lap ba ki briew kiba sah ha kane ka jaka ki la shong ha ki ïing rit ba tap da ki plastic. Kaba sngew lyngngoh ka long ba ki sah haduh kumba 20 bad 30 ngut ha kawei-pa-kawei ka ïing rit bad ki la don haduh palat 80 tylli ki ïing ba la pynïeng da kine ki poiwir.
