Shillong, Ïaïong:
Ki nongshet ba tbit napoh ka jylla Meghalaya kin ïakhun ha ka jingïakob shet ïa ki jingbam bapher bapher ha ka “Hills on a Plate: Meghalaya Chef Wars” kaba la sdang bad pyni ha ka Jio Cinema.
Ki nongshet ba tbit ka jylla kin ïakob shet ïa ki jingbam na ka bynta ban ïoh ïa ka khusnam. Ha kane ka ‘serial’ yn pyni paidbah ïa ka jingïaid lynti ha kylleng ki jaka jong ka Meghalaya, ha kaba ki nongshet jingbam kin ïakhun ha ka ban shet ïa ki jingbam bad ki jingtah kiba bang bad kiba phylla ha ka thaiñ.
Kane ka prokram kan sdang da ka Bynta kaba Nyngkong “MEET THE 7,” ha kaba 7 ngut ki nongshet kiba tbit kin ïakob shet bad ha ka Bynta Ba-ar, “Waterfall Trails and Turmeric Tales,” ka dei kaba la ring ha ki jaka kiba itynnad jong ka Jaiñtia Hills, ha kaba ki nongshet kin ngam sha ka kolshor bad ka rukom shet tynrai kaba la hiar pateng la pateng ha ka thaiñ.
Ha ka Bynta Ba-lai, “Fishing for Flavors in Garo Hills,” yn pyni sha ki paidbah ïa ki jingitynnad jong ki jaka, ki lum ki wah jong ka rilum Garo, ha kaba ki nongïashim bynta kin hap ban pdiang bad bat skhem ha kaba ïadei bad ka jingsma bang jong ki jingtah tynrai. Katba ïa kiwei ki Bynta kiba dang sah la pynkhreh ban pyllait ha ka 27 tarik mynta u bnai.
Ha kine ki 7 tylli ki bynta yn ïadon lang ka Sarah Todd jong ka Master Chef Australia, Ardahun Passah bad William Diengdoh kum ki nongbishar, katba u Gordon Thabah bad ka Abigail Pamei kum ki nongpynïaid. Ki hynñiew ngut ki nongïakhun ki kynthup ïa u Artet Kharsati, Ivan Suting, Adonijah Lyngdoh, Daei Suchiang, Tanisha Phanbuh bad ka Nambie Marak.
Kane ka ‘serial’ ym tang ba kan pyni ïa ka jingtbit bad ïa ka jingdon sap ki nongïakhun ha ka kam shet, hynrei yn pyni ruh ïa ka jingitynnad bad ka jingriewspah ka jylla ha ka jingdon ïa ki jaka kiba itynnad bad ïa ki ïew ki hat.
Ka “Hills on a Plate” kam dei eh tang ka jingïakob shet, hynrei ka dei ruh ka jingrakhe ïa ka jingriewspah ka Meghalaya ha ka jingdon ïa ki jingnang jingtip kiba naduh hyndai-hynthai bad kumta ter ter.
