Shillong, Ïaïong 26
Ka jingpyntreikam ïa ki projek ban maramot bad pynbha pat ïa ki jaka tih mar poh khyndew kiba la julor kan long ha ki 4 tylli ki jaka kiba la dep ban jied kum ka jingpyrshang ban pyntrei. Ïa kine ki projek yn pynkhreh ïa ka Detailed Project Report (DPR) da ka Central Mine Planning and Design Institute Limited (CMPDIL).
Katkum ka tyllong khubor, ki saw tylli ki jaka kiba la dep ban jied na ka bynta ban pyntrei ïa ka projek kum ka jingpyrshang ban pynbha pat ïa ki jaka ba la tih mar poh khyndew ki kynthup 2 tylli ha Khasi Jaiñtia Hills bad 2 tylli ha Garo Hills.
La ong ba 2 tylli ki projek kiba ym pyrshang pynbha pat ïa ka mariang ki dei ha ki jaka ba ju tih dewïong katba 2 tylli kiwei pat ki dei ha ki jaka ba ju don ka jingtih maw.
Ki 2 tylli ki jaka ha Khasi Jaiñtia Hills kiba dei ban pyntrei ïa kane ka projek kum ka jingpyrshang ban pynbha pat ïa ka mariang ki kynthup ïa lai tylli ki krem tih dewïong kiba la shu ieh kumto ha thaiñ Sutnga, East Jaiñtia Hills district bad kawei pat ka dei ka jaka ba ju tih maw ha Umtyngngar ha ka lynti ban leit sha Sohra, East Khasi Hills district.
Ha Garo Hills, kawei ka jaka ba ju tih dewïong kaba yn pyntrei ïa ka projek ban pynbha pat ïa ka mariang ka kynthup ha Agrenggittim kaba don 4 tylli ki krem tih dewïong ha South Garo Hills bad kawei pat ka jaka ka bym dei kaba tih dewïong ka dei ha Wakugre hapoh Selsella Block, West Garo Hills district.
La khmih lynti ba ka jingpynkhreh ïa ka DPR yn sa pyndep noh mynta u snem na ka bynta ban sdang pyntreikam ïa kane ka projek kum ka jingpyrshang ban pynbha ïa kine ki jaka tih mar poh khyndew.
Ka CMPDIL ka dei ka shnat jong ka Coal India Limited kaba hap poh ka jingpeit ka Ministry of Coal.
Kine ki projek ki dei kiba la pynkhreh ban mang lyngba ka Meghalaya Environment Protection and Restoration Fund (MEPRF).
Ka MEPRF ka dei kaba la thaw khnang ban lum ïa ka pisa kaba wan kum ka ‘cess’ na ka jingdie ïa u dewïong bad kiwei ki khajna kiba dei ban wan na ki mar poh khyndew. Kane ka ‘cess’ kaba dei ban poi sha ka MEPRF ka long ` 425 shi metric ton.
