Shillong, Ïaïong 28
Ki pulit ha ka Sngi U Blei ki la kem noh ïa u suba donkti ba 9 na Hatsingi-mari, Assam halor ka jingkynnoh leh be-ijot ïa 2 ngut ki kynthei hapoh 18 snem ka rta ha Chenga Benga Mela, South West Garo Hills.
Ha ka 27 tarik mynta u bnai, ki pulit ki la kem noh ïa u runar ba hakhmat eh jong katei ka jingjia na Teporpara Bazaar, Assam. Ïa kitei, la aiti noh sha ki pulit na bynta 4 sngi ban tohkit.
Ha ka 26 tarik mynta u bnai, ki pulit ki la kem ïa 3 ngut ki samla kiba hapdeng ka rta 22 haduh 25 snem na South Salmara District, Assam – khappud bad ka South West Garo Hills.
Na ki 4 ngut kiba la shah kem kham hashuwa, uwei u la shah kem na kawei ka bos na Rajabala, West Garo Hills katba u dang leit sha Guwahati, sa uwei pat na Teporpara (khappud Assam-Me-ghalaya) katba ki 2 ngut kiwei pat ha ki pulit Assam na Hatsingimari, South Salmara, Assam.
Ha ka kyrwoh ha ka Sngi U Blei, u SP ka distrik, u Vikash Kumar u la ong ba katkum ki jingtip ba ïadei bad ka jingrahbor, byrngem be-aiñ, thombor, bad ka jingleh be-ijot ïa kiba hapoh 18 snem ha ka 16 tarik Ïaïong ha Chenga Benga Mela, la pynngat mukotduma hi da ki pulit hapoh Ampati Women PS Case No 09(04)2024 U/S 376D/323/341/506/34 IPC R/W Section 5(g)/6 of POCSO Act bad ka jingtohkit ka la ïaid.
Ha kajuh ka por, la ïoh lum ruh ïa ki sabut na jaka jong ka jingjia bad katkum ka jingphla jong kiba la ngat ha katei ka apot, ki kaiphod eksamin lem bad kiwei-kiwei ki sabut, la kem ïa 9 ngut kiba suba donkti ha katei ka kam haduh mynta.
Baroh kitei kiba shah kem ki dei ki nongshong shnong ka Teporpara (Assam) kaba don hajan ka jaka jong ka jingjia bad ka jingkem ïa kitei la synran lang da ki pulit ka South Salmara District. La kurup ruh ïa 7 tylli ki ‘mobile phone’ na kitei kiba shah kem bad la khmih bniah bin-pa-bin ïa ki, ong ki pulit.
Lyngba ka jingtohkit, la lap ba ki runar ki la knieh noh ïa ka ‘mobile phone’ na uwei u briew bad byrngem ruh ha ryngkat ka jingdawa pisa na uwei pat u briew. Haba ïadei bad kane, ki pulit ki la pynngat mukotduma ha Ampati PS Case No. 36(04)2024 u/s 392/323/506/34 IPC, and Ampati PS Case No. 34(04)2024 u/s 341/395/384/506 IPC bad ka jingtohkit ka la ïaid.
“Ka jingtohkit ha baroh kine ki mukotduma ka dang ïaid bad baroh kiwei pat kiba suba donkti shen kin sa shah kem. Ngi kyrpad ïa ki paidbah ban pyntip sha ki pulit lada ki don kino-kino ki jingtip shaphang ki runar kiba donkti ha katei ka kam. Ïa ka jingithuh jong ki yn buhrieh,” la bynrap u Kumar.
