Tura, Ïaïong 28
Namar ka jingkiew ha ka jingshit ka jinglong-jingman ka suiñ bneng ka bym shym la pyni ïa ka dak jinghiar mynta la palat shi bnai, u DC ka West Garo Hills (WGH), u Jagdish Chelani u la pynmih ïa ka hukum haba ïadei bad ka rukom pynlong skul hapoh ka distrik.
Ka bynta ba kongsan jong katei ka hukum ka long ba ki skul kim dei ban treikam hapdeng 11 baje mynstep haduh 3 baje mynsngi naduh lashai ka sngi (29 tarik Ïaïong) haduh ka 1 tarik Jymmang.
“La leh ïa kane da kaba buh jingmut ïa ka jingshngaiñ bad ka bha ka miat jong ki khynnah, nonghikai bad nongtrei,” la ong ka hukum.
Ki skul UP, Secondary bad HS kin pynlong klas hapdeng 6:30 baje mynstep haduh 10:30 baje mynstep. Hynrei ym shym la kdew eiei ha ka hukum ban pyrkhing ïa ki SMC ban khang ïa ki skul shuwa ka por ba la buh, da kaba pyntip sha ki bor ba dei khmih.
Na bynta ki Nursery bad skul LP, dei ban pynkut noh ïa ki klas ha ka por 10:30 baje mynstep lashai ka sngi bad ar sngi ki ban wan kin dei ki sngi shuti. La bthah ruh ki skul ban ym pynlong ïa kino-kino ki jingïalehkai shabar ba kynthup ïa ka jingïalum lang ha ka por mynstep. Kumjuh ïa ka ‘Mop-up Exercise’ halor ka ‘National Deworming Day’ lah ban leh ha ka 29 tarik Ïaïong ne ha ka 2 tarik Jymmang.
Katei ka hukum ka la bthah ruh ïa ki skul ban pyntikna ba ki khynnah ki kup ïa ki tupia da sngi ne pyndonkam ïa ki shatri da kaba dih ruh ïa ka um bad ORS ne umsohjew lada jia ba u/ka khynnah ki sngew tyrkhong um ha ka met. Ïa ki skul janmiet bad mynmiet ki lah ban treikam kumba ju long.
Shuh shuh katei ka hukum ka la pyllait ïa ki ‘Coaching Class’ ba la pynlong da ki skul, ‘Skill Training Institute’ bad ki shlem pule ba shalor. Hynrei kine ki jaka ki lah ban khang da kaba pyntip shuwa sha ka tnad pule-puthi.
