Nongstoiñ, Ïaïong 28
Ka Hynñiewtrep Youths’ Council (HYC) West Khasi Hills District hapoh ka jingïalam u samla Lumlang Kharsyiemlieh, President HYC-WKHD ryngkat ki nongïalam ka HYC ka Nongstoiñ Circle bad Lai Lyngdoh Circle ha ka Sngi Thohdieng ka la ïakynduh ïa u Deputy Commissioner ka West Khasi Hills, u Bah Garod LSN Dykes ban kyrpad shimkhia halor ki katto-katne ki mat.
Na ka liang ki nongkitkam ka HYC ki la ong ba kitei ki mat ïa kaba ka seng ka la pynsngew bad aiti ruh da ka jingthoh ki kynthup ïa ka jingkdiah ka jingkieng kaba don ha Kynroh ka lynti ban leit sha Mawkyrwat bad kaba ïaid lyngba ka Wah Kynshi kaba dang hap ha ka jingpeit jingtrei ka kompeni mynta kaba hap ha ka surok Nongstoiñ Wahkaji ha kaba kane ka jingkdiah jong katei ka jingkieng ka la long ka jingma ïa ka ïaid ka ïeng.
La ïathuh ruh ba mynta shipor ki la shna lynti napoh jingkieng, hynrei ha ka por lyïur kam lah kyrshan ka lynti (Subway), namar ka um ka heh. Kumta ka HYC ka la kyntu ïa u DC ban ïarap bthah lem ïa ka tnad bad ïa katei ka kompeni ban pynkloi ïa ka jingtrei ban leh eiei ïa katei ka jingkieng namar ki suki palat ban trei ïa ka jingkieng thymmai haduh mynta ki dang dep tang ki païa.
Ki ïathuh ruh ba lada poi ka lyïur ym lah shuh ban ïaid na kane ka jingkieng rim, ka jingeh kan dei ïa ka thaiñ Lai Lyngdoh bad Mawkyrwat ruh bad kiwei dei ki marbam mardih ka thaiñ kan wanrah jingeh, kumjuh ïa ki khynnah skul kiba leit ha Joel Gatphoh.
Ka mat kaba ar ka long halor ka jingpynsah ïa ki shipai ha ka skul ha kaba ka HYC ka la pynpaw ba ka jingbuh ïa ki shipai kumba 90 ngut eiei ha skul KJP Hr. Secondary School, Tiehsaw, Nongstoiñ, naduh 8 tarik Ïaïong, 2024 haduh mynta, la jan lai taïew la hap sangeh ban long skul bad ka la ktah eh ïa ki khynnah skul, bad ki kmie ki kpa ki la bynñiaw. Kumta ka la kyrpad ïa u DC ban pynkynriah noh ïa ki sha ki ïing Sorkar lada dang donkam ban pynsah ïa ki khnang ba kan ym ktah ïa ka lawei ki khynnah pule.
Halor kine ki mat, na ka liang ka HYC ka la kyntu ïa u DC ban shimkhia ha kaba la ong ruh ba DC u la kular ban shimkhia halor katei ka jingkieng.
