Shillong, Ïaïong 28
U General Secretary ka United Democratic Party (UDP), Dr. Jemino Mawthoh u la ong ba ki jingkheiñ halor ka ilekshon MP ba dang shu dep ki long kiba kham jynjar ban ïoh namarba ka long kaba eh ban sngewthuh ïa ka jinglong jong ki paidbah haba ïadei bad ka jingthep ‘vote’.
“Kane ka ilekshon MP ka kham pher na kiwei pat kiba la dep bad ka long ruh kaba shongshit. Hooid, ki seng saiñ pyrthei ki la kner katba lah sha ki paidbah hynrei lada phi peit ïa kane ka ilekshon (MP) bad lada ïakren ïa ki jingkheiñ, ka kham eh ban ai namar ka eh ban sngewthuh ïa ka jinglong jong ki paidbah haba ïadei bad ka jingthep ‘vote’,” la ong u Dr. Mawthoh.
Haba kdew ïa ka jingkhlaiñ jong ki rynsan lad pathai ha kane ka kynti lyngba ka jingpyndonkam jong ki paidbah, u la ong ba ki rynsan lad pathai ki la long kawei na ki bynta kiba pynshongshit bha ïa u paidbah ha kaba wat ki seng saiñ pyrthei ruh ki la pyndonkam ïa ki ban kner sha u paidbah.
Ha kajuh ka por, haba kren halor ki saw seng kiba kham hakhmat ha kane ka ilekshon ba dang shu dep na Shillong Parliamentary konstitwensi, u General Secretary u la ong ba haba phai sha u kyrtong ka Congress, Bah Vincent H. Pala – wat la ka seng (Congress) ka la hiar bha ha kiba bun ki bynta jong ka ri, ka jingjop jong u ïa ka ilekshon MP la lai sien kynthih, ha kawei ka liang, ka la pynskhem shi kat dei ïa ka jingdon ki nongkyrshan ne ‘vote bank’ jong ka seng.
“Lada ka Congress ka la hiar ha kylleng ka ri bad ka don tang 4 ngut ki MLA hangne, hynrei ka jinglong MP jong u ha kine ki 15 snem, ngim lah ban ong ba um khlaiñ,” u la ong.
Haba phai sha ka UDP bad HSPDP ha ka ilekshon MLA ba la dep, u la ong ba lada kheiñ kyllum lang, ka jingïoh ‘vote’ jong ki 2 seng ka la kot sha kumba 3,65,000 eiei.
“Kumta phim lah ban ong ka Regional Democratic Alliance (RDA) kam khlaiñ khamtam lada ka ‘vote’ ka neh ha kane ka rukom,” la ong u Dr. Mawthoh.
Haba phai pat sha ka National People’s Party (NPP), u la ong ba ka jingïoh ‘vote’ jong ka seng ha kane ka ilekshon MLA ba la dep (Khasi-Jaiñtia) ka long mar ïa bam bad ka UDP ha kaba ka NPP ka la ïoh 3 lak tam.
Utei u nongïalam haba pynsngew ba ka jingai jingkyrshan jong ka BJP ïa ka NPP ka la paw shai ha kane ka ilekshon ba la dep, u la pynshai ba ka UDP kam don jingïadei eiei bad ka BJP.
Halor ka Voice of the People Party (VPP), u Dr. Mawthoh u la bynrap, “Ym lah ban ong ba kam khlaiñ bad ngi la sakhi ïa ka jingkhlaiñ jong ka lyngba ki jingïalang. Lada ngi peit hangne, u ‘Prah’ ruh u don ha ka thup ïakhun hynrei haduh katno pat kane kan kylla sha ka ‘vote’, ym nang ong.”
Shuh shuh u la ban biang ba baroh 4 seng ki don la ka ‘vote bank’ bad ban ai ka jingkheiñ kaba paka, ka long kaba eh than.
