Shillong, Ïaïong 28
U Secretary ka Regional Democratic Alliance (RDA), Bah K.P Pangniang bad uba dei ruh u President ka Hill State People’s Democratic Party (HSPDP), u la ong ba u kyrtong ka United Democratic Party (UDP) Bah Robertjune Kharjahrin kaba la pynïeng da ka RDA ki don ki jaka ba u khlaiñ bad don kiba u tlot.
Haba kylli hadien ba la dep thep ïa ka ‘vote’ ha ka 19 tarik mynta u bnai, u Bah Pangniang u la ong ba ka ilekshon MP ka la ïapher bad ka ilekshon MLA namar ki paidbah ki wad ruh ïa ka shap u sing.
U Bah Pangniang u la ong ba ka RDA ha ka 22 tarik mynta u bnai ka la shong ïa ka jingïalang hadien ba la dep thep ‘vote’ ha ka 19 tarik Ïaïong 2024, hynrei ka RDA kan nang shong biang man ka por ban pynkhlaiñ ïa ka UDP bad HSPDP.
Haba ïa dei bad kane ka ilekshon MP Lok Sabha ba dang shu dep, u Bah Pangniang u la kam ruh ba ka jingïakhun ka long hapdeng ki saw tylli ki seng saiñpyrthei kata ka RDA, Congress, VPP bad NPP.
Halor ka jingbym mih jong ar ngut ki MLA ka HSPDP ban leit ïalap ilekshon ïa u kyrtong ka RDA u Bah Robertjune, u Bah Pangniang u la ïathuh ba ki MLA ryngkat ka seng HSPDP ki la ïarai lang ban kyrshan ïa u kyrtong ka UDP.
Haba kylli la kane ka RDA kan kut noh mynta ka ilekshon MP ne kan nang bteng, u Bah Pangniang u la pyntip ba kan nang bteng namar haduh mynta haba ka Meghalaya ka la ïoh ïa ka jylla kam don ka seng ban synshar hi marwei, hynrei ka donkam beit ïa ka jingsynshar bad kiwei ki seng.
U la ong ka jingïatreilang ha ka sorkar bad kiwei ki seng ka long ban pynkhiah ïa ka synshar-khadar.
Shuh shuh u la ong ba wat u Narendra Modi u dang donkam ïa kiwei ki seng rit ban thaw lang ïa ka sorkar, kumjuh ruh wat ka Congress kaba la synshar la slem ïa ka ri India ka dang wad ïa ki seng rit ha kiwei pat ki jylla namar ki la sngewthuh ba kin nym lah ban thaw sorkar marwei.
Kumta u la ong ba ha Meghalaya ki seng riewlum ki donkam ïa ka jingïatylli namar kim lah ban thaw sorkar marwei namar hap donkam beit ïa ka sorkar bad kiwei ki seng saiñpyrthei.
