![Kut noh ka lehniam Behdeinkhlam ka Seiñraij Kongwasan Chyrmang behdingkhlam](https://unongsainhima.com/wp-content/uploads/2024/04/behdingkhlam-720x406.jpg)
Jowai, Ïaïong 28
Ka Seiñraij Kongwasan Chyrmang ka dei kawei na ki Raij kaba pynlong nyngkong eh ïa ka Behdeinkhlam hapoh Ri-lum Jaiñtia bad ha ka 28 tarik Ïaïong ka la pynkut noh ïa ka lehniam Behdeinkhlam ba shisien shisnem hapdeng ka jingtynnad jong ka mariang.
Kane ka lehniam Behdeinkhlam ba lai sngi lynter ka la sdang ha ka 26 tarik Ïaïong ha kaba u Langdoh Kongwasan Chyrmang ryngkat kiwei ki shakri niam ka Raij ki la pyndep ïa bynta jong ka lehniam haduh ban da poi ka sngi khatduh jong ka lehniam Behdeinkhlam.
Ka Behdeinkhlam ba la pyndep da ka Seiñraij Kongwasan Chyrmang ka dei ka jinglehniam shwa ba ki khun ka Raij kin hiar sha ki hali ki pyntha ban pynhap ïa u symbai u rynai, ban bha ban miat u kba u khaw ban dap ban biang ka ïing ka sem bad ban beh ïa ka khlam napoh ka shnong ka raij.
Ki rukom ka lehniam ne kñia ainguh kiba la pyndep da ki shakri niam ka Raij ki long Than Blai, Thoh Langdoh kñia Ryngkaw, Hat Khrong, ka Kamcharoh Blai, Chad Ïung Thyndai, Boh Synrum. Katba ha ka 28 tarik, ki rukom lehniam la pyndep ïa ka Chad Thyndai, Seh Bhang ha Khloo Blai ryngkat ka nguh ka dem ka suit ka shor, ka jingshad ha Ïung Langdoh, ka jingpynkheiñ ‘Khnong blai’, ka jingpynhiar ïa ki ‘Charoh Blai’ sha Aitnar.
Ki rot ki rong baroh kiba la wanrah ban pynphuh-pynphieng ïa ka Shad Behdeinkhlam ki don 7 tylli hapdeng ka jingkynud ki sur jong ka bom ka bhuri bad la pynphuh-pynphieng bad pynshongshit ïa ka shad Behdeinkhlam da ka jingïashim bynta lang ruh ki khun samla kynthei ha ka riam ka beit ba bun rukom.
Nalor ki khun ka Seiñraij Kongwasan Chyrmang, la wan ban sakhi ruh da u MLA ka thaiñ, Bah Lakhmen Rymbui, Dolloi ka Elaka Jowai, Bah Puramon Kynjing, ki nongïalam ka Seiñraij Jowai kynthup naduh u President Bah Hercules Toi, General Secretary Arwotki Sumer bad kiwei-kiwei ki nongïalam na ki Seiñraij bapher-bapher ka Ri-Lum Jaiñtia.
Hadien ka jingbret ïa ki rot la pyndep ruh ïa ka lehniam Ïadaw Charoh.