Shillong, Naitung 16
U samla Jonathan L Pachau uba dang 21 snem, ba la thwet da ki pulit ha kaba ïadei bad ka case POCSO bad kynnoh ba u la leh be-ijot, u la wan ban aiti noh ïalade hakhmat ki pulit ka thanad Laitumkhrah ha ka sngi Palei, kiba la kem noh ïa u.
U Superintendent of Police ka East Khasi Hills Bah Vivek Syiem u la pyntip ba u Jonathan L Pachau, u la leit ban aiti noh ïalade ha thanad Laitumkhrah hakhmat jong u Officer-in-charge. Une u samla u dei uba donkti ha ka Laitumkhrah PS Case No. 100/2026 u/s 3/4/11/12 POCSO Act bad Laitumkhrah PS C No. 94/2026 U/s 64(1) BNS.
U SP u la ong, ba la kem noh ïa u mardor bad yn sa rah ïa u sha ïingbishar.
Kane ka jingkem noh ka la long hadien ba ki pulit ki la pynmih ïa ka ‘Look Out Notice’ ha ka ri baroh kawei shaphang ka jingphet rieh jong une u samla dang ha kine ki sngi.
Ka jingthwet jong ki pulit ïa une u samla ka dei halor ka jingshah kynnoh ba u la leh be-ijot bad leh kynshleiñ ïa bun ngut ki khynnah kynthei bad kane ka khubor ka dei kaba la paw pyrthei lyngba ka jingpynsaphriang ka jingkynnoh ha ka rynsan Social Media.
Ki pulit kila shimkhia ïa kane ka jingjia bad kila don ruh ar ngut ki khynnah kynthei kiba la wan shakhmat ban ujor da ka ejahar pyrshah ïa u Jonathan L Pachau.
