Nongstoiñ, Naitung 16
Ka Khasi Students’ Union (KSU) Nongstoiñ Circle ha ka sngi Palei kala leit ban aiti da ka jingthoh ban ujor halor ka jingpyntrei torti ïa ka jingsiang rong ïa ka surok hapoh ka sor Nongstoiñ ha ki bynta jong ka shnong Lad Weitang.
U samla Robert Khardewsaw, Education Secretary ka KSU Nongstoiñ Circle u la ong ba ka jingleit ban ujor jong ka seng ïa katei ka jingsiang rong ka dei hadien ka jingud jingnam jong ki paidbah ka sor Nongstoiñ halor ka jingpyntrei torti jong u kontraktor uba pyntrei ïa ka jingsiang rong ïa katei ka surok, kaba la pynlong ruh ïa ka seng ban leit jurip ïa katei ka surok.
Shuh shuh u la ïathuh ruh ba ha katei ka jingjurip jong ka seng la lap shisha ba ka jingpyntrei ïa ka surok khamtam ha ki bynta jong ka Lad Weitang kata naduh marjan ka Indoor Stadium ter-ter shaduh marjan ka ophis DPRO Nongstoiñ kala long kaba torti bha ha kaba ka surok kaba dang shu dep ban siang rong dang shibnai eiei kala sniew bad pei thliew.
U la ong ruh ba halor kane ka bynta, ki nongïalam ka KSU Nongstoiñ Circle hadien ka jingjurip ïa katei ka surok kila leit ruh ban ïakynduh ïa ka Deputy Commissioner jong ka WKHD ka Hema Nayak bad aiti ruh ïa ka jingthoh ban ujor halor katei ka jingpyntrei torti ïa ka surok.
Shuh shuh u la ong ruh ba ka jingpyntrei ïa ka surok kam dei tang ban shu pynsngewbha ïano re ïano hynrei ka dei ban long ka ban ai jingmyntoi ïa u paidbah ba bun.
U la ong ruh ba ka seng kala lap ruh ba ka surok kam don ïa ki nala um kiba biang kaba pynlong ïa ka um ban ïaid nalor bad khlong bad pynjulor ïa ka surok khamtam ha ki por ba jur u slap nalor kata ki lynti ïaid kjat na ka bynta ki paidbah ha katei ka jaka ruh kam don.
U samla Robert u la ong ruh ba na ka liang jong ka seng ha kine ki khyndiat sngi bala dep kala ïoh ban leit ïakren ïa u Assistant Engineer jong ka tnad PWD Road hynrei namar ba ym shym la ïohi dak eiei, ka seng kala leit ban ujor noh sha ka DC ha ryngkat ka jingdawa ban phah maramot biang ïa katei ka surok.
Ha kaba ïadei bad katei ka bynta na ka liang jong ka DC kala kular ha ki dkhot jong ka seng ba kan sa shimkhia ïa katei ka kam.
