Shillong, Naitung 16
Ka Voice of the People Party, State Youth & Women’s Wing ha ka Sngi Palei ki la wan ban ai ka jingkyrshan ïa ki nongrep kiba la mad ïa ka jinghiar dor u mar rep uba ki pynmih bad kaba la buh jingeh kaba khraw ïa ki ban pyndap pynbiang ïa ki jingdonkam ha ki ïing ka sem ki jong ki.
Ha kane ka jingleit ban ai jingkyrshan ïa ki nongrep kubi kiba la wan ban sam ei sha ki paidbah, ka VPP ka la noh synñiang da ka pisa sha ki nongrep bad pynpaw ba kan ym sngap jar haba ïadei kane ka mat, hynrei kan sa shong ban pyrkhat bha hapoh jong ka Party.
Haba ïakren ïa u Bah Wanlam Kupar Nongsiej uba long u Executive Member ka States Youth Wing VPP u la ong ba kane ka jingpynpaw kine ki nongrep ka long shisha kaba sngew lehraiñ ïa ka Sorkar, da kaba u la kynnoh ba ka Sorkar kam shym la don ka rukom pyrkhat na ka bynta ban ïarap ïa ki nongrep.
“Ka jingwan ki nongrep kam dei eh tang ba kin shu sam ei ïa ki mar rep ki jongki, hynrei ba kin pynpaw ïa ka jingkynduh jingeh kumjuh ka jingpyrshah jong ki ïa ka jinghiar dor ki mar rep” u la ong.
Haba bynrap jingkren u Bah Marbud Dkhar u la kynnoh ba ka Sorkar ka ju peit bad wanrah ïa ki Hotel remdor bad ki tamasa baheh, hynrei ïa ki paidbah kiba trei ïa ki kam kiba rit ba ria kam don por ban peit, namar kata u la buh ka jingkyntu ïa ka Sorkar ba ka dei ban peit ïa ka jingbit jingbiang lang jong baroh.
Ka Kong Bahunlang Tron, Secretary Women’s Wing VPP ka pynpaw ka jingsngewkhia haba ïadei ka jinghap dor u kubi bad ka la buh ka jingkyntu ïa ka Sorkar ba kan pyrkhat haba ïadei ka Minimum Support Price (MSP) ha kaba kiwei ki Jylla ki la pyntreikam bad ka la ong ba lada ka Sorkar ka leh ïa kane kan long ka jingmyntoi ïa ki nongrep.
