Shillong, Naitung 16
U Myntri ba khmih ïa ka tnad bording Bah Metbah Lyngdoh ha ka sngi Palei u la batai bad kdew ba ka jingshah bat bording jong ki lai ngut ki khynnah ha Ri Bhoi kum ka jingjia kaba wan jia khlem poi pyrkhat bad u la ong ba ka Sorkar kan sa pyrkhat ïa ka jingsiew bai lutksan ynda la ai ïa ka kaiphod ba thikna.
Haba kren halor katei ka jingjia, u Bah Metbah u la ong ba ka tnad ka la jurip ïa katei ka jaka bad pan ïa ka kaiphod kaba bniah na u Commissioner & Secretary.
“Ki don ki tnad kiba la hap ha ka lain 11 KV. Kaba sngewsih ka long ba ki lai ngut ki khynnah ki la jia ryngkhat ban ïaid lyngba na katei ka jaka,” u la ong.
Halor ka jingsiew bailutksan, u la ong, “Hooid, katkum ka policy ka don. Ngin sa peit bniah ïa kane ka kam bad ai ba kan wan shwa ka kaiphod kaba pura.”
U Myntri u la kubur ïa ki jingeh ha ki jingtei kiba la slem bha ha Ri Bhoi, khamtam eh ïa ki sainar kiba la rim bad ki bym don jingshngaiñ.
“Kane ka don ha man la ki jaka. Ha ka jingshisha, ka Ri Bhoi ka dei kawei ka jaka kaba ngi don ïa kane ka jingeh. Ka jingtei ka la rim bha bad ngi hap ban pynthymmai ïa ka. Ngi dang leh eiei na ka bynta kata ruh,” la ong u Bah Metbah.
U la bynrap ba ka Dorbar Shnong ruh ka la ai ïa ka shithi da kaba kdew kum ka jingjia aksiden, bad u la pynpaw biang ba ka tnad kam shym la thmu satia ba kum kine ki jingjia ba sngewsih kin jia.
